Serlui B tuikhuah chu power MW 12 pe chhuak thei tura duan ni mah se, tui chim chin a hniam zel avangin power MW 5 vel chauh a pe chhuak.
Serlui B tuikhuah hi Power Turbine khawl pathum, MW 4 theuh, a vaiin power MW 12 pe chhuak thei tura duan a ni. Mahse, he hydel project hi a tir atang khan khawl pakhat a that loh avangin, khawl pahnih chauh hman a nih tih thudawnnain a sawi.
Fur ruahtui tlak tlem avangin kum eng emaw chen chu he tuikhuahah hian tui a khat zo ta lo a, hei bakah hian Turbine Tunnel Gate-a tui put (leak) chu thawktuten siam that tumin mi thiam ruaiin an bei tawh a, Turbine Tunnel leak siam tha tur hian tui chim chin tihniam turin hma an la thin bawk.
Hetianga tui chim chin tihniam tura thawktute hmalakna avang leh, he tuikhuah kam chereu ta lutuk avanga furpuiah pawh ruahtui a tlem avang hian Serlui B tuikhuah chu a kâm nasa hle a, power siam chhuak turin khawlte chu tihnun reng ni mah se, tui chim chin hniam avang hian MW 8 pe chhuak thei tura khawl pahnih hmang chung pawhin, tun dinhmunah chuan power MW 5 vel chauh a siam chhuak thei a ni.