Manipur-a thawh hniha assembly inthlan neih turah National People’s Party (NPP) chuan Pathianni khan an manifesto an tlangzarh a. Thawhtanni khan an candidate puan hmasakah bial 20-a ding turte an puang bawk.
Meghalaya Chief Minister leh NPP president Conrad Sangma leh Manipur Deputy Chief Minister Yumnam Joykumar Singh leh State President L Jayantakumar Singh te chuan an manifesto, Action Document 2022 tia an sawi chu hmun hran atangin an tlangzarh.
Manipur hi state dang palite nen thla tharah hian an inthlang dawn a, campaign pawh an bei ngawrh sawt hlawm hle.
Sangma chuan manifesto an tlangzarh thu hi Twitter-ah a tar lang a. “Manipur Election 2022 atana manifestor chu Dy. CM Manipur Pu Joykumar Singh, State Working President Pu Jayantakumar Singh leh Arunachal State President Pu Mutchu Mithi te nen kan tlangzarhho a ni,” a ti.
NPP-in sorkar kal meka an thawhpui mek, BJP Chief Minister N Biren Singh chuan Pathianni vek khan Manipur inthlan turah hian bial hmun thuma thena hmun hnih lain chiang takin an tling leh dawn niin a sawi a. Chief minister tur chu an party hotu lawkten an tihfel tur thu a sawi.
Manipur-ah hian thawh khatnaah February 27 leh thawh hnihnaah March 3-ah vote thlak a ni dawn a, March 10-ah vote tlate chu chhiar a ni ang.
NPP hian an manifesto an tlangzarh tukah an party hminga chuhtu tur mi 20 an puang zui lehnghal.
Chuhtu tur zingah hian Manipur-a an hruaitu lawk tak tak – Laitonjam Jayananda, Sheikh Noorul Hassan, Alhaj Mohd. Nasiruddin Khan, Yumnam Joykumar, L. Jayantakumar, Oinam Romen, Huidrom Vikramjit, W (O)Sumati Devi, K. Sarat Singh, Karam Nabakishor Singh, Kh. Loken Singh, , U. Ramesh Singh, I.(O) Nalini Devi, Th. Shanti Singh, N. Diten Singh, Usham Manglem Singh, M. Ranjit Singh, Maibam Dhanabir Singh, Lunkhopao (Apao) leh N. Kayisii te an ni.