Taliban leh khawthlang ram hrang hrang palaite chuan Norway khawpui, Oslo daiah Afghanistan-a mihring dinhmun tlachhe mek chungchang an sawiho.
Afghanistan-a chengte hi US-in an run hnua kum 20 zet thuneihna an chan hnuah nikum August thlaa Taliban-in an lak let leh atang khan an dinhmun a khirh hle.
United States, France, Britain, Germany, Italy, European Union leh Norway palaite nen hian Thawhtanni khan Oslo daia tlang chhipa awm, Soria Moria Hotel-ah an inbia a ni.
Ni thum inbiak turah hian a tan ni, Pathianni khan Taliban aiawhte hian Afghan mipui pawl hruaitute an kawm a, heng zingah hian women activist leh chanchinbumite pawh an tel a, mihring dikna chanvo chungchang an sawiho.
Hmeichhiate dikna chanvo humhalhnaa thawktu, inkawmnaa tel, Jamila Afghani an inkawmnaa chu ‘vur tlang tikeh tura inkawmna hlawk tak’ tiin AFP news agency a hrilh.
Taliban-te chuan a tha zawnga thil kalpui an duh tih a sawi a, “An chet dan chu an thu sawi atangin kan lo thlithlai dawn a ni,” a ti.
Taliban aiawhte hi mipa vek mi 15 niin Norwegian sorkarin an kalna tura a ruahman thlawhnain Inrinni khan Oslo hi an thleng a ni.
Taliban hian US-in an thil neih $ tluklehdingawn 10 dawn a hren chhuah leh Afghanistan chu khawvel sumdawnnaa tel ve an phut.
Nikum August 15-a Taliban-in thuneihna an chan atang khan ram dangin an puihna chu tihtawp vek a ni a. Hei vang hian mi maktaduai tel chu ei tur kham hmu lovin an awm mek.
US-in an sum a hren leh puihna tawp avang hian pawisa a vang em em a, an ram economy chu tluchhe mai thei dinhmunah a ding mek a ni.
“Afghan thil hren chhuah leh politics avanga Afghan mite hremna pek loh kan duh,” tiin Taliban aiawhtu pakhat, Shafiullah Azam chuan an inbiak ni khatna zawhah The Associated Press news agency a hrilh.
“Tam leh thlasik na tak avangin kan hrehawm a, hei hi ram dangin Afghan an puih hun, politics thil avanga an tlanchhiatsan loh hun niin ka ngai,” a ti.