Khawzawl bawrhsap CC. Lalchhuangkima’n Airtel leh BSNL-a thawktute kawmin, Khawzawl district-a mobile leh internet signal tha zawk a awm theihna tura hmalak dan tur a sawipui.
Khawzawl bawrhsap chuan Khawzawla Airtel distributor te hnenah COVID19 hrileng do kawngah inbiakpawhna tha a pawimawh hle thu hrilhin, hrileng vanga zirna in tam tak khar a nih avangin online-a zirna pekchhuah a ngai a, hun dang aiin mobile leh internet signal chak leh rintlak mamawhna a sang hle tih a sawi a. Airtel signal pekchhuah kawnga Khawzawl district-a mawhphurtute pawh be pawpin, Khawzawla Airtel tower awm mek chu tihchangtlun (upgrade) tura hmalak mek a nih thu bawrhsap chu an lo hrilh a ni.
BSNL tower bunna tur Khawzawl Dinthar venga ruahman pawh Khawzawl bawrhsap chuan tlawhin, a enfiah a. COVID19 do kawnga thawktute, zirlai leh nu leh pa bakah mipui nawlpuiin mobile leh internet signal chhia avanga harsatna an tawh loh na tura chak taka hmalak a tul thu a sawi. Khawzawl district-a telecommunication service tha leh changtlung zawk a awm theihna tura hma la chhunzawm turin thuneitu sang zawkte hnenah ngenna a thlen nghal bawk.