Hollywood star Richard Gere-a’n kum 15 liamta a filmstar Shilpa Shetty bianga a chuk vanga Shilpa-i laka thubuai siam chu Indian court-in ching felin, a chhuah zalen ta.
Delhi khawpuia AIDS awareness pakhata Hollywod star-in Ms Shetty bianga a chuk khan sawi leh sel a hlawhin, a hun laia chai laih laih kha a ni a. 2007 kuma thil thleng hi Hindu pawl thahnem takte chuan thil mawi lo leh Indian value tibawrhbangah ngaiin, bianga inchukna thleng hi nasa takin an dodal a, ‘aw’ an chhuah nasa hle.
An zualkona erawh Court chuan thu tlingah a ngaihsak lova, innghahna chhan mu leh mal nei lo nia sawiin, a tuartu (Ms Shetty) hi a duh reng vanga awm a ni lo, a ti.
Mr Gere hian mipui hmuh lai ngeia stage-a a chet dan hi a hnu-ah thil mawi a nih loh thu sawiin, ngaihdam a dil. Khati anga a tihchhan chu in kiss hi a him tâwk a, HIV hrik inkaichhawn theihna a ni loh thu tarlan a tumna a nih zawk thuin a sawi fiah.
Ngaihdam a dil hnu lawka Mr Gere man theihna warrant chhuah chu Su-preme Court-in thu tlingah ngai lovin, a inrawlh lo.
Bianga inchuk thubuai hi kum rei tak nghah a nih hnuah Mumbai-ah tihfel a ni ta a, Ms Shetty lam hawiin thutlukna siam a ni. India rama court kalphung leh kal dan rei em em thinin sawi leh sel a hlawh phaha.
Shilpa Shetty hi Bollywood-ah hriat lar ni mah se, 2007 kuma UK reality show, ‘Big Brother’-ah chi leh vun rawng lam hawia hmuhsit rawn a nih khan a tilar lehzual a, he contest-ah hian a champion zui.