Lengteng bialtu MLA L.Thangmawia’n a bial chhunga tunhnaia hripui leng hluarna Ngopa leh Saichal khuate tlawhin, RAT kit, hand sanitizer, PPE, facemask bakah Saichal VLTF hnenah Rs 30,000 leh Ngopa VLTF hnenah Rs 50,000 a hlan a. Chhawrtui khuaa COVID19 vanga harsa zualte tanpui nan buhfai bag 13 (kg 650), tel packet 23, dal kg 23 a pe bawk.
L. Thangmawia chuan a bial chhung khaw pahnih Saichal leh Ngopa-ah te lockdown ngai hial khawpa hripui kai an pung chu pawi a tih thu a sawi a. Sorkar leh VLTF te ruahmanna tha taka zawm chhunzawm zel turin khawtlang mipuite a chah bawk.
Lengteng bialtu MLA chuan hripui do turin tanrualna a pawimawh tih sawiin, “Sorkar leh VC te, mimal tea do hneh chi a ni lova, khawvel sorkar ropui zawkte pawhin an do hneh lo. Keini erawh chuan Pathian rawn chungin, thuawihna nen Zo nun zemawi kalpui chungin khawsak harsa zawkte zingah chhuanchham an awm loh nan kan tan tlan a ngai a ni” a ti.
Lockdown puanna khuaah te chhuanchham an awm loh na turin mipuite chu mit leh beng lo lena, VLTF leh sorkar thuneitute hnenah leh a tul ang zela a hnena thlen turin a chah a. A tih theih chin apiang a lo tih nghal zel tur thu a sawi bawk.