Khap ngah state, rethei chunga chapo kan ni mai em?
Mizoram sorkarin zu khapna dan, Mizoram Liquor Prohibition (MLP) Rules zirchiangtu tur committee a din, thawhtannia thukhawm chuan grape chingtuten MLP Rules-ah an thar chhuah atanga wine siam phalna telh an rawtna chu a hnawl a, grape chingtu tam tak tan chuan kawl a la eng rih dawn lo nite pawhin a ngaih theih awm e.
Mi hrezau zawk leh zirchiangtu thenkhatte sawi dan chuan zu (alcohol) lam kan lo khap a nih pawhin, keimahni tharchhuah ve ngei hi chu zawr sumah siam thei ila, tu pawi mah a sawi loh bakah, kan sum leh pai dinhmun pawh tam takin a tihthat phah an ring thin bawk. Mahse, kohhran kawra hmang a, dik ziktluak leh chuang si lo mi tlemte te vang hian sakhuana kan la vawng a, sual kan hmu tam a, ram rethei, chapo tak si kan nih phahte pawh a ang thin.
MLP Rules Drafting Study Committee hi an chairman, Deputy Chief Minister Tawnluia hoin an thukhawm a, an thutkhawm hmasaa thu an dah, MLP Rules-ah wine siam phalna an telh leh telh loh tur an sawi ho a, wine siam chu khawtlang leh kohhran inrelbawlna enin a remchang lo nia an hriat avangin MLP Rules-ah hian telh loh nise tiin an rel ta zawk a ni. He thutkhawmah hian Excise Minister Dr K Beichhua, IPR Minister Lalruatkima, Excise Dept hotute, Mizoram Kohhran Hruaitute Committee (MKHC) aiawh te, Central YMA aiawh te, Mizoram Upa Pawl (MUP) aiawh te an tel bawk.
Khap kan ngah lutukna hian ram rethei min nihtir reng a, mahni tharchhuah ngei pawh kan khap duhna ramah hian beiseina kawl a eng har hian a hriat thin. Chutihrual erawh chuan, kan chunga roreltute thu thua awm tura tih kan ni si a, lungawi zel i ching phawt mai teh ang u.