US Coast Guard thuneitute chuan Inrinni zana Florida vaukama lawng leta chuang mi 39-te chu an zawng mek.
Thuneitute hian Thawhlehni tuka sangha mantuten mi pakhat, lawng khaikhup chunga lo awm an hmuh thu an hrilh atangin he chhiatna hi a thleng tih an hre chauh va. Chetsualna thlenna lai hi Fort Pierce khawpui atanga km 72 vela hla a ni.
Dam chhuak pakhat hian Bimini, Bahamas atanga chhuak an nih thu leh Inrinni zan khan khaw awm dan dik lo takin a nang ta tih a sawi.
US thuneitute chuan lawng hi thil sual tih nan, mihringa sumdawnna kalpui nana hman a ni thei niin an sawi.
Dam chhuak awm chhun la ni rih hi tunge a nih sawi a la awm lo va, a chuanpui dangte zingah life vest ha tumah an awm lo niin a sawi.
An chin hriat lohte zawn hna hi Miami Coast Guard kaihhruaia thawh niin lawng leh thlawhna nen an bei niin Twitter-ah an tar lang.
Thawhlehni chawhnu (India-a Nilaini chawhma) thleng kha chuan tumah nung dama hmuh an la nei lo.
Bimini thliarkar hi Bahamas-a khawthlang tawp ber district niin Miami nena an inkar hi mel 80 emaw chauh a ni.
Thuneitute chuan Bimini leh Fort Pierce inkarah an zawn thu leh mek 135 vel bial a nih thu an sawi.
Florida vaukamah hian mihring tawt taka phur lawng chesual hi thil thleng fo thin a ni a. Tam tak hi Cuba leh Haiti ram atanga US-a a ruka luh tumte chuanna a ni thin.
Zirtawpniah pawh khan Coast Guard chuan Bahamas khawthlang lamah lawng pakhat, Haitian 88 zet tawt taka an chuanna an man thu an sawi.
“Florida Straits, Windward leh Mona Passages vela lawng tawt tak leh lawng upa tawh lam nena chhuah hi a hlauhawm a, nunna chân mai theihna a ni,” tiin Coast Guard chuan thuchhuah an siam.
“Coast Guard leh kan thawhpui agency dangte nen helaia hetianga zin vel hi tihtawp kan tum reng a. Kan lo man che u a nih chuan in rawn chhuahnaah kan thawn kir leh ang che u,” an ti bawk.