Mizoram sorkarin Covid-19 leng avanga inkhuahkhirhna khauh zawk a kalpui atanga ni 20 chhungin Lengpui Airport-ah hri kai 579 hmuh chhuah a ni.
January 6, 2022 khan Mizoram pawn atanga khual zin mi lo thleng hlimte chu Covid-19 leng kara himna tura dan (SOP) chu Mizoram sorkarin khauh zawka kalpuiin, sorkarin a pawm china RT-PCR test-a negative result nei te tih loh RAT test hmanga khualzin lo lutte chu endik vek turin thupek a tichhuak a. He thupek hman tan a nih atanga January 26, 2022 thleng khan Lengpui Airport-ah flight 89 awm tawhin khualzin 5,596 an lo lut tawh a. Heng zingah mi 3,259 te RAT hmanga endik an niin, hri kai 579 hmuhchhuah a ni.
January 11, 2022 khan Lengpui Airport-ah flight paruk awmin, khualzin 417 an awm a. He’ng zingah mi 279 te RAT hmanga endik an nih hnuah, mi 68 te hri an kai tih hmuhchhuah a ni a. Ni 20 chhunga hri kai hmuh chhuah tam ber tum a ni a. Hri kai hmuh chhuah tlem ber ni chu January 24 khan niin, flight panga thlengah khualzin 226 an awm a, heng zingah mi 119 endik an ni a, mi 11 hri an kai tih hmuh chhuah a ni.
Kum thar January 1 atanga January 25 chhung khan, India ram pawn (international passenger) atanga khualzin hi mi 258 Mizoramah an lut tawh a, mi pahnih chu hri an kai tih hmuh chhuah an ni a. Heng mite hi Singapore leh Australia atanga thlengte an ni.
Internatioal passenger thlengah Singapore atanga Lengpui Aiport kaltlanga Mizoram lut an tam fal hle a, mi 75 an ni a. India ram pawn atanga khualzin lut tam lamah USA chu pahnihna an ni a, mi 43 an ni a. Dubai atangin mi 23, United Kingdom atangin mi 20, Nepal atangin mi 15 leh Thailand atangin mi 10 an awm a ni.
Heng bakah hian Australia atangin pakua, Qatar atangin pariat, Germany atangin pasarih, Norway atangin paruk, Hong Kong atangin mi panga, Ireland leh Amsterdam atangin pali ve ve an lo lut tawh a. Maldives atangin pali, Japan atangin pathum an lo lut tawh bawk.
UAE, Sri Lanka, Canada, Saudio Arabia, Kuwait atangin pahnih theuh an lo lut tawh a. France, Mauritus, Tanzania, Romania, Phillipines, Geneva, Italy, Indonesia, Egypt, Armenia, Israel leh Guinea atangin pakhat theuh kumin chhung hian Mizoram-ah an lo lut tawh a ni.