Indonesia-a West Papua province-ah Thawhtanni zan khan nightclub-ah insual buaina nasa tak chhuakin kangmeiin a man zui a, mi 19 vel an thi.
Sorong khawpuia Double O club-a chhiatna thlengah hian mi pakhat vih hlum a ni a, thi dangte hi kangmei a chhuah tak avanga a chhunga tangte niin thuneitute chuan an sawi.
Kangmei chhuah tan dan tak hi hriat a ni lo va; mahse, pawl inhal tak pahnih, chem leh fei nena an insual hnu lawk atanga chhuak a ni.
Insualna thleng hi West Papua hmun danga tam tak, inlak hran duh pawlte chetna thleng ni lova ngaih a ni.
“Khawpui lianah chuan thalai insual hi an awm fo va; mahse, tun tuma mi hi chu thi an tam avangin a danglam a, a vawi khatna a ni,” tiin police thupuangtu chuan Metro TV a hrilh.
Zan dar 11:00 (India-a zan dar 7:30) vel atanga buaina chhuahah hian police chuan club chhunga tangte hi lak chhuah tumin an bei tih an sawi.
A awmna chu meiin manin building lian tak chu a chhawng hnuai ber atangin meiin a khuh ta vek niin an sawi.
Thawhlehni tuka kangthelhtuten an thelh mih chuan nightclub chhawng chung lam pindan chhuatah ruang 18 an hmu ta a.
Inrinni zan pawh khan pawl pahnih hi an lo intibuai tawh a, police pawh hian an intihthiam lohnaah inremtir tumin an lo be tawh.
Police hian khawpui chhunga insual buaina dang a thlen zui tawh loh nan duty pawh an indah belh teuh niin AFP news agency chuan a tar lang.
Tun tuma insualna hmun vel hi an province chhung hmun danga thleng nasa tak, Indonesian venhim hna thawktute leh inlak hran tum pawlte intihbuaina a thlen ngai lohna hmun a ni.