Union Minister Kiren Rijiju chuan China sipai, People’s Liberation Army chuan Arunachal Pradesh rawlthar an kawl mek chu India hnenah an hlan let tep tawh tih an sawi tih Nilaini khan a sawi.
Arunachal Pradesh, Upper Siang district-a Zido khaw rawlthar, Miram Taron-a hi Line of Actual Control bul lawka January 18-a a thiante nen an chhuak chu a bo a ni.
A awmna chin hriat loh a nih hnuah hian Arunachal-East bialtu BJP MP Tapir Gao chuan Twitter-ah Taron-a a bo thu leh India ram chhung atangin PLA-ten an ruk bo a nih thu a tar lang.
Indian Army chuan Chinese sipaite hi be zui nghal thuaiin a awmna chin dappui tur leh an hmu a nih chuan a lo kir lehna turah puih turin an sawm.
PLA hian a hnu lawkah an ram chinah mi pakhat an hmuh thu leh a nihna chiang taka an hriat leh theih nan leh mi bo mek chu a ni em tih hriat theih nan chiang zawka hrilh turin India sipaite a hrilh.
Indian Army pawh hian Taron-a thlalak leh a nihna kimchang hi Chinese sipaite an pe leh tawh bawk.
Rijiju chuan ram pahnih sipaite hi Republic Day pualin hotline hmanga inbiain PLA chuan an mi kawl mek chu chhuah an tum hnai tih an sawi niin a sawi a. An chhuah ni tur leh hun chu an hriattir leh mai dawn thu a sawi bawk.
“Hotline hmanga Republic Day-a Indian Army leh PLA inbia chuan PLA atang hian thu lawmawm dawngin kan ram mi chhuaha min pek let an tum a. A hun leh ni an sawi thuai rin a ni a, khaw awm dan avangin a hun hi ruahman lawk mai a harsa a ni,” a ti.