India ram Republic Day vawi 73-na chu Nilaini khan lawm a ni a, a lawmna pui ber hi tih dan thin pangngai angin Rajpath, Delhi-ah hman niin President Ram Nath Kovind chuan 871 Field Regiment-a Ceremonial Battery-in an kaihhruai parade chibai chhang letin thuchah a sawi.
Kumin Republic Day-ah hian Jammu & Kashmir Police ASI Babu Ram chu chawimawina sang, Ashok Chakra hlan niin he chawimawina hi kum 2020-a Srinagar-a mi firfiakte beihnaa huaisen taka a chet vanga hlan niin mi pathum a that a. A aiawhin a nupui leh a fapain president hnen atangin an dawng.
Republic Day parade hi zingkara Prime Minister Narendra Modi-a’n National War Memorial tlawha ram tana nun hlantu sipaite zahna pangpar a hlan atangin tan a ni.
Defence ministry chuan kumin parade-ah hian ruahmanna dang deuh an siam a, heng hun pawimawh chhim ve phak ngai lote an sawm a, heng zingah hian auto-rickshaw khalhtu, insakna lama thawktu, kawng kam thian faitu leh damdawi ina thawkte chu parade chhim tur hian a bikin a sawm a ni.
Parade-ah hian India sipai thuam leh theihna te, nun dan phung danglam tak tak te, vantlang khawsak dan leh ei bar dinhmun hrang hrang pho chhuah a ni.
Delhi khaw vawt tak hnuaiah Republic Day lawm hian Rajpath-ah mi thahnem tak an pung khawm a. Parade-ah sipai contingent 16 inlanin paruk hi Army an ni a, Navy, Air Force, National Service Scheme leh Delhi Police atangin pakhat theuh, Central Armed Police Force atangin pali, pakhat leh National Cadet Corps pahnih an ni.
Lieutenant Manisha Vohra-i kaihhruai Army Ordnance Corps Contingent chuan lawm a hlawh hle a. Ani hi hmeichhe zinga Army Ordnance Corps contingent kaihhruai hmasa ber a ni.
State leh union teritory hrang hrang atangin tableaux 12 pho chhuah a ni a, ministry leh department pakuain an chhawp chhuak bawk a. Maharashtra-in an khuarel lam, Karnataka-in an kut themthiamna, Meghalaya-in an state kum 50 tlin pual, Punjab-in zalenna sualtute leh National Education Policy leh ennawn dang tam tak pho chhuah a ni.
Republic Day lawmnaah hian lâm thiam mi 480 thlan chhuah niin Vande Bharatam an lantir a. Sipaiten an hmanrua an pho lan zingah Centurion Tank, PT-76, MBT Arjun MK-I leh APC Topaz te a tel bawk.
Indian Air Force chuan flypast-ah thlawhna leh helicopter 75 zet an pho chhuak a. Indo thlawhna zingah Rafale, Sukhoi, Jaguar, MI 17, Sarang, Apache leh Dakota te chuan formation hrang hrang – Rahat, Eklavya, Trishul, Tiranga, Vijay leh Amrit te an entir.
Lawmna inkhawm hi tih dan thin angin Hnam Hla tiria bul tanin Hnam Puanzar rawng balloon chhuah a ni bawk.