Myanmar tual chhung buaina kal zelah Thawhlehni zan khan Myanmar lam atangin Zokhawtharah mi 200 chuang an tlanchhia a, mi thenkhat erawh an let leh tawh.
Thudawn danin Thawhlehni zan dar 8 bawr vel khan Myanmar ram chhung, Rihkhawdarah Myammar sipaiten geletine ni ngeia hriat an tihpuah bakah silai vawi sarih vel an hmet puak a, mipui thlabar mi 200 rual vel chu a zan a zanin Tiau lui kânin Zokhawtharah an riak lut a ni.
Zokhawthar atanga km 3 vela hlaa awm Rihkhawdarah hian tun hnaiah Myanmar sipai hi an indah belh nia sawi a ni a, panga paruk vel awm thinnaah khan 60 vel an awm tawh nia sawi a ni.
Thudawnnain a sawi danin, Tiau chhak lawk Siallam khuain mitthi an nei a, mitthi vuinaa kalte chu Myanmar sipaite chuan People’s Defence Force (PDF) emaw, anmahni bei tura kal nia ringin lo inhrosak nan an silai an hmeh puak nia sawi a ni.
Zokhawthar police-te chuan Zokhawthara tlan lut hi mi eng zat chiah nge hriat a ni rih lo tih an sawi a, mi 200 vel an nih a rinawm thu leh, a then chu an let leh thute an sawi.
Zokhawtharah hian Myanmar atanga raltlan rawn lut mi 1,353 an awm sa a, camp-a awm te, in luah te, chhungte belte an ni.