AMC ward VIII bialtu councillor Christsna Roluahpuii Sailo-in ward fund atanga a lei, competitive exam hmachhawn tumte tana tangkai tur lehkhabu hrang hrang chu nimin khan a biala veng pathum – Armed Veng, Armed Veng South leh Chite Veng YMA library-a dah turin a hlan.
Lehkhabu inhlan inkhawm Armed Veng South YMA committee room-a neihah Christina Roluahpuii chuan a thiam leh phak tawka an ward hmasawnna tur a ngaihtuah thin thu sawiin, nimina an thil tih chu hmasawnna tur zinga a ngaihpawimawh zinga pakhat a nih thu a sawi a. An ward chhungah talent nei tha tak tak leh tumruh tak tak an awm tih a chian thu sawiin, chungmite pui tura an banphak tura lehkhabu tha chhawpchhuah chu tul a tih thu a sawi.
Christina Roluahpuii chuan an lehkhabu leite chu coaching centre enkawltute leh mithiam zawkte rawn chunga lei an nih thu sawiin, a mamawhtute mamawhna erawh a phuhru zo dawn lo tih a chian thu a sawi a. “Tlem tala an mamawh a lo phuhruk chuan thil lawmawm tak a ni ngei ang, mi pakhat talin an lo tangkaipui a nih chuan kei chuan ka thil tum ka ti hlawhtlingah ka inngai ang, a tam thei ang berin erawh hmang tangkai se ka duhthusam a ni,” a ti.
He inkhawm kaihruaitu ward committee member K Chalkhuma pawhin ward committee tha taka an function thu sawiin, “Ward fund awm ang angte councillor-in committee-ah pharhin, a hmanna tur ngaihtuahho a ni thin” a ti a. “Engkim councillor hian langtlang takin a kalpui a, kan ward hi ward committee function thatna ber a nih a rinawm hial a ni” a ti bawk.