Champhai district-a tlawmngai pawlte chuan Bawrhsap Maria CT Zuali’n Champhai a chhuahsan loh nan a chenna (bungalow) luhka an veng chhunzawm zel.
Bawrhsap sawn chhuahna thupek sut phuta sorkar kar nan Champhai District NGO Coordination Committee (NGO-CC) chuan hma an la chhunzawm zel a. Mizoram sorkar thupek angin January 26, 2022 thleng kha a awm hun tur a nih avangin Champhai a chhuahsan tur hi Republic Day atang khan a bangla luhkaah an veng.
Maria CT Zuali hian Champhai a chhuahsan loh nan bangla luhka bula an dan a tul thu sawiin, “Chhuah ringawt ila kan ho der dawn a. Vawiin lamah pawh rawn ruk chhuah tum tih thawm te a awm a, kan han ri leh hak thin. Naktuk lamah amah ngei pawhin a hun a tawp tawh avanga chhuah luih a tum palh thei a; khatiang reng reng veng khan kan awm a ni ber mai,” tiin nimin khan NGO-CC Chairman Lalnunmawia’n The Zozam Times a hrilh.
Lalnunmawia chuan bawrhsapin Champhai district mipui tan a tam thei ang ber hna a thawh an duh avangin, a banglaah hnathawh an phalsak thu leh a office atanga file process pawh an phalsak tih sawiin, “Hei erawh hi chu, tun dinhmunah kan ti chhunzawm zel ang em tih erawh ka hre lo,” a ti.
Maria CT Zuali’n Champhai a chhuahsan tur an ven chungchangah, “Sorkar hian February thla thleng emaw, kan thu ngaichang hian min bengkhawn se tih hi kan beisei ber a ni. A chhan chu, dan dik zawka hma latu zawk khawih chea a dik lo zawk, FIR thehluhtu ding chang tura hmalakna a ang riau khan kan hria a, chu lai chu kan lungawi lohna ber a ni,” a ti a; tun thlengin sorkarin engmah a la bengkhawn loh thu leh, an hmalak zel dan tur pawh ngaihtuah chhoh zel an tum thu NGO-CC Chairman hian a sawi bawk.
Tar lan tawh angin, Champhai bawrhsap sawnna thupek sut phutin NGO-CC hmalaknain Champhai khawpui chhungah dawr khar, pisa khar, kawng zawh leh Republic Day boycott huaihawt a ni tawh.