Doctor indaih loh kara Thenzawl Community Health Centre (CHC)-a Medical Officer (MO) pakhat sawn tura ruahmanna Thenzawl Joint YMA chuan theihtawpa dodal an tum.
January 25, 2022 khan Mizoram sorkarin Thenzawl CHC-a thawk mek M.O. pahnih zinga pakhat, Dr Benjamin Malsawmtluanga chu Sialhawk-ah sawnin thupek a tichhuak a. Thenzawl PTS-a M.O. awm lai Dr Lalramhluna chu Thenzawl CHC leh PTS hmui tura tih a ni.
Hemi chungchangah Thenzawl Joint YMA chuan January 26, 2022 khan thutkhawm hmanhmawh an ko a. Thenzawl CHC atanga doctor sawn chhuah a ni leh CHC a doctor awm tur zat ang pawh an awm loh laia, PTS Thenzawl nena intawm tura doctor siksawi a ni chu pawi an tih thu an sawi a. Thenzawl CHC doctor te chu khaw thenawm nen an intawm thu sawiin, hetianga doctor sawn tura ruahmanna awm hi pawi an tih thu leh, theihtawp chhuaha dodal an tum thu an sawi a ni.
Thenzawl Joint YMA chuan an khaw chhunga NGO hrang hrang nen Joint Meeting ko nghalin, an hmalakna turah mipui tawiawmna an ngen thu an sawi bawk.
Thenzawl doctor sawn chungchangah Serchhip West Block MNF hruaitute pawhin Health Minister Dr R. Lalthangliana chu biain, harsatna an neihte an thlen tawh a. Joint VC lam pawhin Minister bakah C. Lalramzauva, Adviser to CM hnenah te hmalak sak turin an thlen bawk. Sorkar hotute hian an thu thlente ngai pawimawhin an ngenna tih hlawhtlinsak thei dawn avangin lawmawm an tih thu a sawi thung.