Govt. Mizo High School, Aizawla Atal Tinkering Laboratory(ATL) siam thar chu nimin khan School education director James Lalrinchhana’n a hawng.
School education director chuan tunlai khawvel hmasawnna nasa tak karah Science lama tuihalna zirlaiteah tuh a ngai tih sawiin, Laboratory changkang leh tunlai thiamna hmanga thuam, Govt. Mizo HS-in a nei chu lawmawm a tih thu a sawi a. Govt. Mizo HS atangin mithiam tak tak scientist-te an chhuak belh zel dawn tih a sawi.
Zirlaite hmasawnna atan regional competition buatsaih theih ni se a duh thu School education director chuan a sawi a. Zirlaite chu midangte umtu ni ringawt lova hmahruaitu nih tum turte, hriatna leh thiamna tak tak nei tur leh chutiang atana laboratory hawn thar chu hmang tangkai turin a fuih bawk.
Sorkar thuchhuahin a tarlan danin, Atal Tinkering Laboratory hi NITI Aayog, Govt. of India Flagship programme pakhat Atal Tinkering Laboratory (ATL), Atal Innovation Mission (AIM)-in a kalpui niin, Rs. nuai 10 senga din a ni a, a hnuah Rs. nuai 2 zel, kumtin hmuh chhunzawm theih tur niin, chumi nen chuan a project pumpui chuan Rs. nuai 20 a keng a ni. Robtech Pvt. Ltd. leh Symphony Explorer Pvt. Ltd. ten he projet hi an enkawl a. India ramah School 9500 leh zirlai nuai 75 ten an chhawr dawn a ni.
ATL thar hawnnaah hian Govt. Mizo HS principal, headmaster, zirtirtute leh zirlai thenkhatte an telin, zirlai ten he Lab atanga an thiam thar te an entir bawk a ni.