- PL Liandinga
Mizoram tana daingul hrawl ber zinga ngaih, sualna dova, thatna leh tlawmngaihna chawisang tura ngaih, YMA chuan tunhnaiah thawm danglam tak mai a nei a, chu thawm chu mipui beisei bak a ni. YMA meuhvin lungawi lohna thil an huaihawt atanga laklawh takah an thurualpuite an inhnuhdawhsan thut mai a. Mipuiin YMA tih atan thil mawi lo niin an hria a, khual khua atanga lo hretute pawhin mak kan ti a, YMA thiltih dan hi tih awm loh deuh takah kan ngai a ni.
Kuhva tawlh ruk thu kal zelah Champhai DC chu sorkar thupek a kenkawhna kawnga hna tha tak thawk a, Smuggler-te do zawnga khawsa niin mipuiin kan hria a. Chuti chung chuan DC chu kuhva tawlhtute hekna avangin sorkarin a sawn ta mai a. He thil mak tak mai hi mipui mimirin an ngaithiam lova, Champhai khua ni ve lo pawhin mak kan ti a. Tlawm thlak te pawh kan ti a ni. Mizoram neitu, Mizoram thatna duhtu mi rilru tluang pangngai tan chuan Smuggler-te leh sorkar thupek zawmtu DC chu inkhing tawkah kan ngai lova, ralkhat atanga rilru na fe fe pawh kan tam viau.
Champhai mipui lungawi thei lo chu inpun khawmin tlawmngai pawl rintlak tak tak ni a ngaih te chuan Champhai DC an sawn chu sut leh turin sorkar an kar a. Urhsun takin tihdan tur pawh an duang lawk vek a. Hetah hian thil awmdan karah ngaihdan han zep lawk ila, hetiang thilah chuan YMA te hian ho khawmtu chan an chan chawk thin avangin hemi tuma Sub-Headquarters YMA-in Chairman hna an thawk lo hi ngaihtuah tur zinga pakhat a ni ve.
An tihtur duan sa zinga pakhat an ti hman chauhva, a dawt leha an tihtur an han tih dawn chuan Champhai Sub-Headquarters YMA chu an inhnukdawk ta thut mai a. Smuggler-te hi khawi ramah mah thil tha thlentua ngaih an nih loh avangin Smuggler-te lama tan hi khua leh tui pangngai te tan thil tih ngai loh a ni a. Chuvangin Mizo ten thil tha lama mipuite hruaitu tura ngaih, YMA te hetia an inhnuk dawk ta mai hian mipui a barakhaih hle a ni.
Tunlaiin chinchang inhriatna a tam tawh a, Champhai YMA Sub-Headquars Secretary hnena thil an han zawh khan a chhanna atang khan sawi tur a hre lo hle tih a lang a. A thawhpui, a hnial theih si loh ten inhnuhdawh an ti ang a, thiante chungchang a chhe zawnga sawi a duh si lovang a, chuvangin a tan sawi tur a awm lo a ni mai awm mang e a tih theih.
Pawl kalphungah Sub-Headquarters YMA an inhnuh dawh chuan a President berin inhnuhdawh a duh tihna ni ngeiin a lang a. YMA Sub-Headquarters President hian inhnuhdawh lo duh ta se a chhan engnge awm thei ang tih ngaihtuahna a lo lut leh a. Ani hi sorkar hnathawk a ni a, a sorkar hna lamah venthawn a nei em ni ang? Sorkar hian a vau em ni ang? Nge ni a amah hian eng hlawkna emaw, kaisanna lam te a beisei lai a ni ang a, mawi leh mawi lo pawh thlu lovin mahni tanghma ngaihtuah avangin kal zel hi a ngam ve ta lo em ni ang tih te thlengin a ngaihtuah theih bawk.
Eng pawh ni se hetiang YMA chetdan hi kan hre tlem hle mai a, Champhai te chu Mizorama khaw ropui pawl anga kan lo ngaih a ni a, Champhai YMA te chu huaisen tur te, rinawm tur leh thil tam takah rintlak tura kan lo ngaih laiin a hun lo lai takah an ralbang ta thut hian ngaihtuah a titam a. Tunhnu zelah Champhai Sub-Headquarters YMA hi kan hmuhdan a danglam loh vek pawhin amah Sub-Headquarters President bik hi kan ngaihdan a danglam thei dawn a. Nakin thlengin, ‘Hei hi khatih laia Sub-Headquarters President kha a nia,’ tih a hlawh zui zel ang em tih pawh ngaihtuah tham tak a ni a. Hmuh theih a hamthatna a dawn chhunzawm lek phei chuan a mimal rinawmna (integrity) chu a nghing thei viau dawn a. Hamthatna engmah a dawn loh pawhin a tan inhnuh dawh man kha a tam viau thei bawk. Hmingchhiat phah hrep si a engmah nihpui leh ta lo a ang thei ang.
Sub-Headquarters YMA hruaitute hi kuhva tawlhah hian an lo inhnamhnawih te a nih phei chuan a pawi hlein a rinawm a. Thil awmzia hi mi thil chik mite chuan an ngaihven zui zel dawn a. Sum leh pai hlawkna tlansan ngam lova YMA hruaitu nih te hi thil hlauhawm ve thei tak a ni. YMA kan nih phat hian thenkhat chuan hlawkna an beisei ni te pawhin a lang a (hruaitu nih kan chak dan atang hian), mahse chu chu YMA pianphung leh YMA member tam tak ngaihdan a ni lo. A tul hunah chuan mipui tana huai taka mahni hekna tur pawha ding turin YMA hruaitute chu kan beisei a ni. Chuti ni lova hamthatna zawng zawng chang vek tura YMA hruaitu nih tum chu thil intuha lo tak a ni thei.