Hri leng hluar tharah inbuatsaihna tha zawk neih a tul
Hri lengin min nuai na leh tan hle mai a, nitin kai thar pawh sangbi an awm zel tawh mai. Kan fimkhur thar lehzual a ngai a, inbuatsaihna tha tak hnuaiah he hri rawn hluar thar leh hi kan lo hmachhawn a tul tawh hle.
Sorkar pawhin ruahmanna a siam zung zung a, thil dang, pawimawh ni em em si lo kalsan a, hri leng hi a lo hmachhawn thiam a tul awm e. Chuti a nih loh chuan inpuhtawn chungin, hmalak loh theih chuang si lovin kan pherh leh nek ang tih hlauhawm tak a ni.
Tun hnaia health minister ho a hri leng kaihhnawih hotu sangte thukhawm pawhin theihtawpa lo inruahman leh inbuatsaih tha an tih thu an sawi hi a lawmawm a, hma la nghal zung zung thei ngei bawk teh se.
SAD Conference Hall-a Covid-19 dona kawnga thawktute leh hmanraw dinhmun sawihona neihah hian hri leng a hluar leh tak avanga thawktu lama harsatna an tawh dante sawi chhuah niin, hri dona kawnga volunteer mi 672 chhawr lai mekte thla hnih dang chhawr chhunzawm tura sorkarah dil mek a nih thu leh mi dang mi 173 dil belh nghal a nih thute tar lan a ni a, a hlawhtlinna pawh hmuh thuai ni se la, sorkar hian he hri leng hi ngaih pawimawhah a neih thiam a tul tawh hle. An mamawh dang hrang hrang pawh tihlawhtling thuai bawk se.
Kan ramah ngei pawh mi tam takin nunna an chan phah tawh a, kai thar an rawn pung chak chho leh viau tawh bawk nen, roreltute thu thua awm tur mipuite hian, roreltuten fing leh rem hre tak, mamawh tawk ang zela an relchhuahsak hi kan duh ve bawk tih hrereng chungin inbuatsaihna lo nei tha zual zel se la, sorkar hian ruahmanna tha zawk nei zel bawk rawh se.