Champhai Grape Growers Society leh Hnahlan Grape Grower & Processing Cooperative Society-in grape bikah wine rules siamsak turin Mizoram sorkar an phut.
Nimin khan pawl pahnih hruaitute hi Hnahlanah an thukhawm a, grape bikah wine rules siam turin sorkar an phut a, grape wine chu alchohol content za zela 11-a siam phalsak ngei tura ngen nise an ti a, kum 2020 leh 2021 chhunga grape wine an siam chhuahte Mizoram district tina zalen taka hralh phalna pe tura sorkarah ngenna siam nise an ti bawk.
Society pahnih hruaitute thukhawmin an rel angin sorkara an thil nawrte bawhzui turin society pahnih atangin hruaitu mi panga ve ve Aizawlah kalin sorkar hotute an hmu dawn a ni.
Tar lan tawh thin angin, MLP Rules Drafting Study Committee chuan wine siam leh zawrh khap an duh a, cabinet-ah rawtna thlen an tum a. He hmalakna hi Champhai leh Hnahlan tlangdunga grape chingtute chuan duh loin lungngaihthlak an ti.
Champhai Grape Growers Society-ah hian member 140 awm mekin nikumah grape qntl 1050 an thar chhuak a; Hnahlan Grape Grower & Processing Cooperative Society-ah member mi 230 awm mekin nikum khan grape qntl 500 chuang an thar chhuak a ni.