South Korea hi ram changkang tak ni mah se, rilru lam hriselnaah buaipuitham khawpin an dinhmun a chhia a, intih-hlum tamna ramah an langsar. Nikum khan mi 100,000 zelah 26.6 intihlum ang an ni a, US aiin a lethnihin an tam.
Korea Suicide Prevention Center-a mithiam Paik Jong-woo chuan intih-hlumna tamna chhan hi social stigma vang a ni a, ram dan ang lo takin South Korea mipuite hian rilru lama harsatna an neihin tanpuina leh chhawmdawlna kawng an zawh ngai meuh lova, mithiam pan thin hi mi tlemte an ni, a ti.
A bik takin entertainment industry-a awmte dinhmun a tha lo lehzual. “Artist te hian mipuite hmangaihna leh star rawn an nih theihna turin rilru sukthlek dan chi hrang hrang an tawngbuak a ngai a, mipui hmuhah an sensitive em avangin an tan inven leh awmdan thiam hi a harsa lehzual,” a ti bawk.
Entawnna tha lo
Kum 2008 khan Korean filmstar lar tak Choi Jin-sil a intihlum a, nasa taka vawrhdarh a nih bawk avangin mipui lamah a tha lo zawngin nghawng a nei nghal. A kum hmasa nena khaikhin hemi kuma ramchhung intihlum hi sangkhat vel zetin an pun phah, tih a ni.