Congress thalai chuan Mizoram ei leh bar innghahna lian bera ngaih, sorkar hnathawkte hlawh a hun taka Mizoram sorkarin pek an phut thu an sawi.
An thuchhuahah MPYCC chuan MNF President leh chief minister ni bawk, Zoramthanga’n SEDP pawisa chu Mizoramah chhungkaw 50,000-60,000 hnenah sem a tum thu sawi a, Kolasib-ah chhungkaw 1,000 atanga 2,000 vel cheng sing lo, sing nga pek theih ngei tura inngaia pawisa an sem thei a nih chuan Mizoram ei leh bar innghahna lian bera ngaih sorkar hnathawk hlawh a hun taka pe tura an phut thu an sawi.
“Sorkar hnathawk Group A leh Group B-te kum 2021 December hlawh kha sorkarin a pe thei lawk lo a, a huna pek an nih loh avangin harsatna tam tak a thlen phah tawh a. January thla chanve pelh ni 17-ah Group A leh B hlawh pek an ni chauh a. Sorkar hnathawk hlawh pek mumal loh hian sorkar hnathawkte chauh ni lo, mipui mimir hian nasa takin kan tuar vek,” an ti.
Congress thalai hian restricted tender hmanga tul hmasa loa sum senna kalpui a nih lai leh SEDP pawisa sem tum a nih mek lai hian thil pawimawh hmasaa pawisa awm lo tih hi chhuanlam tlinga an ngaih loh thu an sawi a. Mau chi supply nana ‘supplier’ mi pathum hnena Rs. vaibelchhe 15 seng thei sorkar hian pawisa a nei a ni tih an pawm thu sawiin, MNF sorkar hian thla thar hma ni hnuhnung bera a mi chhawrte hlawh a pek theih loh pawhin, thla tir ni khatah hlawh hi pe ngei rawh se an ti.