- Zirsangkima
Kan faten an phone charge lai an vil rùn chinah chuan vil lêt an hun viau tawh tih hre thiam ila …
……
‘Duh hun huna phone la hman, mi zahawm tak ka hre ngai lo!’ tia Divine Intervention school-a ka thawh laia kan principal Pu R Zochhawna thu sawi kha ka hre reng \hin.
Chawi ei lai te, chhûng inkhâwm neih lai te, Sande sikul kai lai te, office dàwr laitea phone ‘ring’ apianga phili chung zêl hi mi zahawm tak an awm ka la hre ngai rêng rêng lo ve bawk a!
Khatia Pu Zochhâwna’n thu chah fing tak min chah lai khân a sikula thawk zirtirtu phone nei kha kan la tlém hle. BSNL ah pawh 943614/15 leh 19 nei kha kan la ni hlawm a. Airtel an rawn lût \an ve êk êk a; a nambar pawh 9862… vek kha a la ni. Chuti chung chuan zirtirtuho kha, class room-a phone ken luh kha min khap bur mai a. A lo \hatzia ka chhar ve chheih chheih chauh!
Awmna apianga phone khawih zêl; duh hun huna WhatsApp message chháng hman; WhatsApp group tina mi reply hnà thawktu—chowkider emaw tih mai tùrte hian ram ropui min thlen ka ring chiah lo … ni lo, min thlen lo ang!
Daktawr phone be sek; mahni dam lo pawh ngaihven hman loa WhatsApp group admin nihnaa active hle hi awm ta se, inentír man ka pe hreh hle maithei! Tutor phone khawih addict te, air hostess phone khàl hrât te, nurse, phone call zawng zawng lâk tum te, mitiri Instagram khawih âwl lo te, chawhmeh zuar Fb nuam ti êm êm te, minister phone-a ck sim zai rél lo nih te hi a inrem viau lo ang.
Chaw ei lai leh inthiar lai êm êm pawha phone khawih sim thei lote hi an changkàn vak ka ring chiam lo! A ‘ring’ apianga ring fàna phone awmna zawng ruai mi zahawm tak sawi tùr ka la hriat loh vàng pawh a ni ang—hetia ka \awng huai êm êmna chhan hi! In hre bîk em ni?
Kei chuan, ka fanu hi, duh duh huna phone be hman hnênah tuition ka kaltír lo ang a; hnà a thawh hunah pawh, chutiang mi chu a pú atán ka duh lo ang.
Zirlai tán hlei hlei phone khawih hlei nih hi a pawi viau ang! Online class an kal tâk sup avàngin kan fate phone kan lei tharsak sup a … a bâk—an class lâkna bâk kan vil zui leh loh chuan a pawi thei tlat. Tûnlaiah zàna inrîm loin phone hmangin an inrîm tawh,’ tih hi awih chi!
Kan faten an phone charge lai an vil rùn chinah chuan vil lêt an hun viau tawh tih hre thiam ila … Thawh hlim atanga bathroom an luhpui zuk zuk tawh chinah phei chuan, an nun ulukpui an lo ngai riau tawh maithei a nia…
Nihawichi chip chunga message zawng zawng chhàn tum fanu te, scooty khalh paha phone ‘ring’ chháng hman tho fapa te, nau neih san pêk paha WhatsApp message chháng hman nupui te hi ka nei ang tih ka hlau a nia—reu reuina!
Kan zahawmna hi mahniin kan insìam ve thei a, leisak ni loin! Insùm ve det pawh a ngai ang. Mite min ngaih hohna leh hoh lohna hi kan koa tlâk chin a awm ve a… Thiam loh tùr awm lohna khawvêlah hian a \ùl dàn azira kan inzir te pawh a ngaih chin a awm ve ang.
Mi te nuih tùr ngawtin kan piang chhuak lo a; mi dang zah kài hi phù vèna chin kan nei. Kan phone avànga mite nuih ti zatu nih hi kan ba lo a; mi dang nuihsawha min siamtu atán paw’n i phal ngai lo ang u khai.
Hetia ka sawi avàng hian phone hi kan hmang sual ta vek e, ka tihna phei chu a ni lo. A tangkàizia te pawh hi ziah tel ka châk kher mai! Mahse, a mi nazawngin kan neih tâk supah hian inzir ngai hi kan la awm ta fur si a.
FarStar zuar atanga Maruti car hralhtute hnêna daily-a thawkte thleng hian inzir kan la ngai tláng si a; hetiang lam ziah hi \ûlah ka ruat a, ka rawn àu chhuahpui ve lawm lawm a nih hi!
Changkàn lam pan tuma smartphone kan hùm rual hian kan smart sawt lo thei ve tlat a nia! Kan smartphone hian min tih smart loh zawngin changkàn lam kan hlat fú thei tlat. Thiam loh thiam hreh loin a \ùl huna inzir hreh lo ila, hma lam pan tum ve tlat ila, inzir hniam hle mah ila ât hlen tum bîk lo ila. ‘A ni êm êm lo’ china phone khawih bànsan ngam ve ila… Min betu apiang chhàn kan tum zêl ten kan buai lutuk thei ve tlat a nia.