Inkhuahkhirhna dan ennawn a tul
Hri leng a hluar thar leh hle mai a, mitin kan fimkhur zual sauh sauh a va ngai em. He hri hian eng chen nge min chenchilh dawn a hriat loh ang bawkin, a kaite taksaa a thawh nat dan a inang lo a, lo lak lap ngawt chi lah a ni hek lo bawk.
Health Minister chuan lockdown remchang tawh lova a ngaih thu sawiin, inkaihhruaina erawh ennawn a ngaih thu a sawi a, theihna zawn theuha hmalak thuai thuai zel hi chu a ngai a ni.
Tuna hri leng mek chu nikum aiin a chak bik tih a chiang tawh a, chumi avang chuan mipuite an fimkhur zual a tul thu minister hian a sawi a, “Mi tin mai hi kan pawimawh a, chhungkaw tin hi kan in-lockdown thiam a ngai a, CAB hi kan zawm that chuan tuna hri leng hluar leh mek hi chu a reh leh vat theih kan ring,” a ti bawk. Mahni zawn theuha fimkhur kan inzirtir a, kan fimkhur zual sauh sauh hi chu a ngai tawh hle a ni.
Mizoramah Omicron a awm leh awm loh an sawi theih rih lo thu Dr Thangtea chuan sawiin, “Mizorama Covid-19 kaiten eng hri ber nge an kai tih hriat nana genome sequencing kan tihna, National Insitute of Bio-medical Genome (NIBMG), Kolkata-a thawktute hi an Covid vek mai a, sample kan thawn an endik thei lo,” tiin, eng hunah nge an endik dawn tih pawh an sawi theih rih loh thu a sawi a, fimkhur zual hi chu kan va ngai em.
Kan dinhmun hi a him lo a, chiang lo chho nuai leh ta bawk. Mahni tawka kan fimkhur a, sorkar inkaihhruaina kan zawm that hram hram a, a theih hram chuan mahnia awm leh mask vuah that hi i ngai pawimawh thar hle teh ang u.
Kan inkaihhruaina thenkhat pawh hi ennawn ni thuai se la, him lo leh dik tawk lo tam tak a awm ngei mai. Sorkar pawh hian endikin, siamtha thuai thuai zel mai se, hri leng laka kan himna hi a pawimawh ber tih min hriatsak se la, kan inkaihhruaina hi kan hun mil zel ni bawk teh se.