Mamit district village council association (MDVCA)-in thlakip chhuak tur – Mamit district village council association monthly bulletin – an buatsaih chu nimin khan Mamit district MJA president RD Darthanzaua’n Mamit press club-ah a tlangzarh.
MJA president chuan Mamit district village council association-in monthly bulletin an buatsaih chu hmasawnna rahbi pawimawh nia a hriat thu a sawi a. Mamit district-a VC hrang hrang ten mahni veng leh khua theuha hmalaknate an inhriatpuitawna, hmasawnna lamah inelna tha a hrin ngei a beisei thu a sawi bawk.
Mamit district VC association president Lalropuia pawhin an bullettin buatsaih chuan VC hrang hrangte thawhhona leh hmasawnna kawngah rah tha a chhuah a beisei thu a sawi a. A enkawltu tur Editorial board te inpekna fakawm a tih thu a sawi.
NH44A (Lengpui – Tripura) siam mek chungchang sawiin, Mamit district VC association president chuan harsatna hrang hrang avanga chawlhsan a nih hnuah Mamit district VC association-in nikum September khan chief minister Zoramthanga hnenah kawng siam chhunzawm a nih theihna tura hmalakpui turin an ngen thu leh kumin January 2022 atanga hna chhunzawm leh a nih tak thu a sawi. He kawngpui hi Mamit district mipuite tan kawng pawimawh ber a nih avangin company te hnathawh pawh an vil reng dawn tih sawiin, hun tiamchhung ngeia kawng chu siam zo tura company lam pawh an phut thu a sawi bawk a ni.