Kum 2021 chhung khan Cyber Crime Police Station-in First Information Report (FIR) 482 an dawng a, chung zingah chuan pawisa lama inbumna a tam ber.
Nimina cyber crime laka mipuite an him theihna tura inzirtirna, Cyber Jagrookta Diwas hawnna neihah FIR lut zat hi tar lan a ni.
FIR lut zinga 345, zaa 71.57 chu pawisaa inbumna (financial fraud) a ni a, a dawttu chu social media/sexual harassment niin FIR 86 a lut.
A dangte chu sextortion chungchangah FIR 14, social/sexual media harassment-ah 12, misc-ah pariat, false rumor-ah pasarih, identity theft-ah paruk, copyright infringement leh hacking/phishing-ah pahnih ve ve a ni.
Cyber Jagrookta Diwas hawngtu, Home Minister Lalchamliana chuan Mizo mipuiten website hrang hrangte bakah netbanking te, online shopping te, online games leh social media application hrang hrangte an hman tangkai thu sawiin, hetih lai hian kawng dik lo zawnga hmang duhtuten inbumna chi hrang hrang an duang chhuak a, mi tam tak an bum tih a sawi.
Home minister chuan, “Heng inbumna laka kan inven thiam theih nan Cyber Jagrookta hi India ram pumah buatsaih a ni a, thla tin Nilaini hmasa bera hman thin tur a ni,” a ti.
Cyber Jagrookta Diwas hi cyber crime lama mipui fimkhurna chawk thotu atan leh an hriatna tifimtu atan te, an nun leh rohlute a lo him zel theih nana tangkai a nih ngei a beisei thu home minister chuan a sawi bawk.