Aizawl: Mizoram State Health Care Scheme (MSHCS) hnuaiah sorkar hnathawk nghette chhiar tel lovin Mizorama chhungkaw awm zat atanga 40% vel an inziak lut.
Health Minister Dr R Lalthangliana kaihhruaina hnuaiah tlawmngai pawl hrang hrang aiawhten nimin khan MSHCS chungchanga inrawnkhawmna, SAD Conference Hall-ah an nei a, he hunah hian MSHCS hnuaia inziak lut zat hi tar lan a ni.
He thutkhawmah hian MSHCS hotute chuan health care bill tang zinga nikum February thla chin chu an pe zo thawkhat tawh tih an sawi a, Covid-19 vanga sum harsatna awmin a nghawng thu an sawi.
Tun aia MSHCS hnuaia inziak lut an tam zawk theih dan turte ngaihtuah a ni a, mipuiten tun aia an ngaih pawimawha an inziah luh tam chu a pawimawh thute kalkhawmten an sawi bakah rawtna hrang hrang an thlente ngaihthlak a ni.
Thutkhawmah hian Mizorama sorkar hnuaia hnathawk nghette medical reimbursement nen chhunfin chungchangte pawh sawi rik a ni a, uluk leh zau zawka la sawiho tha tih a ni bawk.
MSHCS hnuaia inziah luh dawna rei tak tak intlar ngai lova ruahmanna siam a tul thu pawh tar lan niin, online registration tih theih dan kawng zawn a tul thu tar lan a ni bawk.
MSHCS chungchanga inrawnkhawmna kaihruaitu, health minister chuan MSHCS-a inziak lut turin mipuite a sawm nawn leh a, “MSHCS hi kan mamawh hun atan a pawimawh em em a, kan mamawh lo hlauh a nih pawhin mi dangte tana luan chhuahna a ni tho tho,” a ti.
Health minister chuan MSHCS-a inziah luh hun hawn laia inziah luh a pawimawh thu sawiin damloh hnu leh hun khar hnu chuan a buaithlak tawh thin tih thu a sawi bawk.
He thutkhawmah hian CYMA, MUP, MHIP, FMGE&W, ACLCA, NGHAM, All Mizoram VC Association, CADC, LADC, MADC aiawhte, Finance Department leh MSHCS hotute an tel.