Chinese sipai, People’s Liberation Army (PLA)-in Arunachal Pradesh rawlthar an ruk bo nia sawi an kawl laia kut an thlak nasa nia sawi chu India chuan China a sawipui dawn tih a sawi.
“Chinese lamte nen hemi chungchang hi kan sawiho ang,” Ministry of External Affairs thupuangtu, Arindam Bagchi chuan a sawi.
Kum 17 mi, Miram Taron-a hi Chinese sipaite hian January 18 khan Line of Actual Control (LAC) bula Lungta Jor, Arunachal Pradesh atangin a thianpa, Johny Yaying-a nena an ramvak chu an ru nia sawi a ni.
Yaying-a tlanchhia chuan thuneitute hnenah a thlen.
Chinese sipaite hian Miram-a hi Indian Army hnenah January 27 khan Wacha-Damai interaction point, Kibithu, Anjaw district-ah an hlan let.
Miram-a pa, Opang Taron chuan PLA-in a fapa an kawl lai hian a mit tuama phuarin kut an thlak niin a sawi a. Electric pawhin an shock tih a sawi.
Congress hruaitu, Rahul Gandhi chuan Nilaini khan parliament-ah rawlthar ruk bo nia sawi hi sawi chhuakin Narendra Modi-a sorkar chuan Pakistan leh China chu a tanduntir niin a puh a. Hemi chungchang hi Bagchi chuan a sawi zui duh lo va, External Affairs Minister S Jaishankar-a’n a chhang fel tawh niin a sawi.
Gandhi-an a sawi hnuah hian Jaishankar-a chuan mi thenkhatin ‘history zir an ngai’ niin Twitter-ah a tar lang.
“History lesson te chu: Kum 1963 khan Pakistan-in dan lovin Shaksgam valley chu China hnenah a hlan a. China-in 1970 chho velah PoK kaltlangin Karakoram highway a siam a ni,” a ti.
Minister hian kum 1970 chhova ram pahnihin nuclear-a an thawhhona a sawi a. “Kum 2013 khan China-Pakistan Economic Corridor bul tan a ni a. Nangmah leh nangmah kha inzawt la, China leh Pakistan hi an inhlat ngai em?” a ti.