COVID-19 thawh thumna, inkai awlsam tak, Omicron-in a thlen chu India ramah thawh hnihna aiin a thawk nep zawk a, tunah chuan ziaawm lam a pan leh tawh zawk niin sorkar chuan a sawi.
Nikuma hri leng thawh hnihnaah khan mi nuai chuang an thi a. Ni khata hri kai pawh nuai li tlin chang pawh a awm tih union health ministry-a Joint Secretary Lav Agarwal chuan Ningania thuthar lakhawmtute a kawmnaah a sawi.
“Covid kai hmuh pawh a hniam zawngin a kal leh tawh a. ‘Wave’ tih leh ‘a vang lai’ tih tawngkam hman hi kan duh lo va, tunah hian hmun thenkhatah chuan a kai hmuh pawh an la tam hle a. Covid hmachhawn dan kalphung hi kan kalpui zel a la tul a, hmun hrang hrangah a kai hi kan la tam rih a ni,” tiin Agarwal chuan a thawh thumnaah a vanglai a thleng tawh em tih chungchang zawhna a chhang.
Sorkarin a chhinchhiah dan chuan January 21 leh February 3 inkar chawlhkar hnih chhung khan ni khata hri kai hmuh hi a zahve vel zetin a tlahniam tawh a. A tira mi mi 3,47,254 kai hmuh chu a tawp nia chuan mi 1,72,433 chauh an ni tawh.
Hetih chhung vek hian sample endik atanga a kai hmuh chhuah zat bi (positivity rate) pawh 39% zeta tlahniamin a tira 17.94% ni chu tunah chuan 10.99% a ni tawh.
Sorkar laipui chuan hri leng ziaawm zel avangin state leh union territory hrang hrangte chu Covid-19 inkai darh lohna tura fimkhur taka thil kalpui chunga sikul hawn leh kalpui hnai turin a rawn.
Union education ministry chuan state-te chu an huam chhunga sikul hawn leh hawn lovah thu titlu tur leh zirlai nu leh pate rawna sikul hawng turin a ti a. A huhova thiltihna ang chi-ah dan zam (standard operating procedures) zawm zel turin a ti bawk.
Ministry chuan sikul hawn leh tur chungchangah hian vantlang hriselna leh himna tura dan zam turte pawh a tharin a duang a, a tichhuak leh tawh bawk.