- Aremruati Ngente
Cl – X kan zir laiin kan Mathematics teacher Sir Gilbert Rosiama hian home work awlsam deuh anga lang, harsa ru zet mai hi min pe a. Paper-ah zawhna min ziah tir a, in lamah kan chhang a, kan chhanna kan pe let leh a. A zawhna chu hei hi a ni, “I thu thua awm tur, ei rawh i tiha ei tur, e rawh i tih a e tur awm ta se. Eng ang miah nge i chhuah ang?” tih hi. Ka kum 15 thluak khan a ngaihtuah ve nasa khawp mai a. “Beiseina nung nena khawvel hmachhawn tuah ka chhuah ang” ka ti tain ka hria?
A chhanna kan pek khawm hnua Sir Gilbert-a sawifiahna kha a ni ka rilrua awm zui ta reng chu. “Khawvelah hian i thu thua awm tur, ei rawh i tiha ei tur, e rawh i tiha e tur, mu rawh i tiha mu tur chu mi pakhat chauh a awm. Nangmah kha i ni, eng ang miah nge i inchhuah dawn? tih kha.
Nimin deuh lawk khan ka whatsapp status ah,” Harvard University chuan an prog eng eng emawah Inaugural Poet ah lo hmang fo tawh mah se, Amanda Gorman hming kan lam sup supna chu nimin mai kha a ni. Amazon lamah “The Hill. We Climb and Other Poems” by Amanda Gorman, lei theih rih lohin a awm leh der tawh? The Hill We Climb bik Kindle Edition Rs 600 chuang lawihin. Louise Gluck phei chu… A lawmawm lam zel a ni e” tih hi ka hmang a, kan u pakhat hian, “Kan rama nula kum 22 vêl chuan Korean-ho an ngaisang \awk?” tih hian a rawn reply zeuh a, kan titi zui ta chiam a,kan han sawi kan han sawi takah chuan kan ngaihdan leh thlir dan pawh a thuhmun viau.
Kan titinaa ka sawi kha amah ka chhanna anih rualin ka ngaihtuah ve fo thil a ni reng reng. Khawvel ram dang, hnam dang han thlir kual ila, Miss World te hi Creative writing lamah te hian an lo sang fu zel a. Zirna lamah pawh topper ni vek lo mah se, a \ha pawl an ni zel. Lam an thiam a, lehkhabu an chhiar nasa a. Mipui hmaa eng thil pawh show thut tur leh eng topic pawh sawi thut thei turin an lo inzir lawk sa vek emaw tih mai tur te hi an ni \hin. Mi ram politician, ram hruaitu te hi literature-ah hian an thuk fu zel. Thil hrang hrang an chhiar kual a, an zir kual a, zirlaite interaction neih pui tur pawhin hriatna tizau hawk thei, ngaihtuahna thar min pe thei titi hi an pai reng fo. Keini kan rama kan entawn tur te hi eng nge ang kan tih ve?
Kan ram Politics, Economics kan thlir a, \halai nunphung kan en a, mipui mimir nunphung kan thlir a, kan duhkhawp lo a. Nikhua kan hriat theih tirh a\angin kan thu hriat ngai hlir kha kan la hria a, hmasawnna erawh kan hmu tam lo viau. |angruala siam\hat a ngai kan ti a, kan \angrual thei lo kan ti bawk si a. Chuti anih chuan keimahniin kan thunun theih chin tal hi kan \an rual tir a ngai a ni mai lo’m ni?
Tu pawh hian keimahni tawk te teah nau awm kan nei \heuh a. Keimahni nau te, \henawm te nau te, hnathawhna lama kan nau te, social media lama kan nau te pawh an ni ang. Kan nau awm te hi an duh zawng apiang kan chhawp chhuahsak dawn nge? An tana \ha tur kan chhawp chhuahsak dawn? Kan nau awm te hian min kaihruai dawn nge? Keimahnin an tana \ha tur ngaihtuah thiamna an neih theih nan an rilru sukthlek kan thlaksak dawn?
Thil tam tak kan ngaihtuah thei rih lo anih pawhin, hei tal hi ngaihtuah nawn fo ang u.
Min entawn tute engtin nge an nun ang?