Kolasib DC Dr H. Lalthlangliana chuan nimin zing khan Myanmar raltlan, Khamrang khuaa awm mekte a tlawh a. Thlamuang taka awm tur leh dan leh hrai zawm tha turin a chah.
Dr H. Lalthlangliana hian thu sawiin Covid avanga sorkar a chauh lai tak a ni nachungin, sorkarin a theih tawkin a chhawmdawl tur thu a sawi a. “In ramah harsatna a thlen avanga manganga rawn tlan thla in ni tih kan hria a; chuvangin, tunah chuan thlamuang takin awm ula; amaherawhchu, in awmna khua inkaihhruaina te, sorkar dan leh hraite in zawm tha tur a ni,” a ti.
Vanlalfaka Ralte, SP Kolasib pawhin raltlante hnenah, “Ram hrang hrangah harsatna hrang hrang avangin raltlante an lo awm tawh thin a, khawsak harsatna avang leh chhan hrang hrang avangin an zingah mipat hmeichhiatna te, naupang chunga hleilenna te leh rukrukna te a thleng fo thin a; chuvangin, nangni chungah pawh hetiang harsatna hi a thlen loh nan fimkhur takin in nun a pawimawh dawn a ni,” tiin khawtlang leh ram tana harsatna siam lo turin a chah a. Harsatna an nei emaw, mi tuten emaw harsatna an siam emaw a nih chuan an dikna humhalhsak turin police an awm reng thu a sawi.
DC Kolasib hian DM&R kaltlangin raltlante tan Khamrang khawtlang hruaitute kutah buhfai bag 45 a pe a. CMO Office Kolasib-in Covid-19 vaccine an pek nghal bakah free medical checkup an neihpui a, thosilen leh damdawi an an sem nghal bawk.
Khamrangah hian nikum October vel atang khan raltlan hi an lut tan a, tunah hian chhungkaw 18 vel awmin mihring hi 102 an awm tawh a. Raltlan zingah hian naupang pawh thahnem tak an tel.