India chhim lam, Karnataka-a high court chuan Muslim hmeichhe zirlaiten classroom-a an lu an tuam phal loh chungchang ngaihtuah tura petition a dawn pahnih chu a ngaihtuah dawn.
Sorkar enkawl pre-university college (higer secondary school)-a tleirawl zirlai parukten classroom-a an lu tuam an phalsak dodalna kal zelah court hian petition a dawng a ni.
Heng mite hi collage inkaihhruainaah lu tuam chung chuan class an kal phalsak an ni lo va. Campus chhunga an lu tuam chauh phalin classroom-ah erawh an phelh a ngai a ni.
India-a sakhaw zuitu tlem zawk, Muslim tam tak chuan hetianga sakhaw tih dan phung inkhapsakna hi an duh lo hle a, danpuiin an duh anga inthuam turin phalna a pe vek niin an sawi.
Hmun khata thil thleng hian state chhunga zirna in dang pawh kangkai thuaiin Ningania video pakhat darhah chuan tleirawl lu khuhten college gate an hual tuau tuau lai pawh hmuh tur a awm.
Video-a mi hi Karnataka-a Udupi district, Kundapur-a pre-university college pakhata thil thleng a ni a. A hmain khapna dodalna hi Udupi-a hmun dangah a lo thleng tawh a, he district hi Karnataka-a sakhua leh chi thil kalpui hluarna, vaukam hrul state pathum zinga mi a ni.
Mi thenkhat chuan heng lai hmun hi Prime Minister Narendra Modi-a telhna, Hindu nationalist BJP lenna niin Hindu politics pawh a lian hle a. Karnataka-ah hian BJP-in ro an rel mek bawk.
Video thehdarhah hian zirlai pakhatin exam an hmachhawn mai turah thuneitute chu lehkha an zir theih nana pui turin a ngen a; mahse, principal-in an lu an tuam chhung chuan luh a phalsak lo.
Hmeichhiate class-a an kal phalsak loh hma ni hian college-a mipa zirlaite chuan saffron shawl nen sikul an kai thung a. Hei hi Hindu symbol niin Muslim hmeichhiaten an lu an tuam an duh loh an lantirna a ni.
Hetiang hian Karnataka-a college pathumah chuan mipa zirlaite chuan an ti a ni.
State Education Minister Nagesh BC chuan college thuneitute thlawpin zirna ina saffron scarf leh lu tuam chu khap tur a nih thu a sawi.
Zirna ina luh phalsak loh hi zirlaite hian nasa takin an tuar thei dawn niin an insawi a. “Mi mal college-a zirna a to avangin sorkar college-ah kan kal a. Mi dangin an sakhaw thilte an kalpui theih laiin engvangin nge keini hi en hran bik kan nih?” tiin Udupi college-a lu khuh phal loh dodaltu zinga mi, Almas AH chuan a sawi.
Karnataka-a Muslim zirlai hmeichhiaten high court-a petition an theh luhte hi karleh lam hian ngaihtuah a ni dawn.
Pakhat zawk hi zirlaiin a thehluh a ni a, India ram danpui hnuaiah fundamental right chuan an duh anga inthuam turin phalna a pek laiin zirna inin a khapsak chu ni thei lo niin a sawi.
A dang hi zirlai tho, zirna inin an khap duh lotu mi pangain an thehluh a ni a. Sorkarin academic guideline a tihchhuahah pre-university college tan inthuamna tur sawi a awm lo niin an sawi.
Petition pahnihah hian an thenawm, Kerala-a court-in Muslim zirlaite chu national entrance exam-ah lu tuam a phalsak tih an ziak lang ve ve.
///////////////