Mizoram sorkarin nimin khan Covid-19 leng chungchanga inkaihhruaina thar a tichhuak a, Red Zone puanna huam chhungah inkhawm khap a ni.
State Executive Committee chairman, Chief Secretary Dr Renu Sharma-i’n nimina hriattirna a tihchhuahah Mizoram chhungah Covid-19 pangngai baka hri thar, ‘Omicron’ a darh zel tur ven nan inkhuahkhirhna nasa zawk siam turin thuneitute rawn chungin thutlukna siam a ni tih sawiin, inkaihhruaina hi thuleh awm hma atana hman tur a nih tih a tar lang.
Inkaihhruaina tharah chuan H&FW Department-in Operational Guidelines an chhuah dungzuia Red Zone puanna huam chhungahte chuan sakhaw biak inte khar tur a ni a, sakhaw biakna hawi zawnga punkhawm phal a ni lo.
Red Zone pawnah erawh biak ina leng zat chanve aia tam lovin kohhran inkhawm pangngai neih phal a ni a, zing tawngtai inkhawm pawh phal a ni.
Bazar leh dawr hawn phal ni mah se Red Zone huam chhungahte chuan dawrte chu odd leh even dungzuiin ni tin khar thin tur a ni.
Deputy Commissioner-in LLTF leh dawrkai inzawmkhawm pawl hruaitute rawn chungin dawr hawn dan tur ruahmanna a siam ang, executive/police duty-te chu bazaar lun deuh laiah CAB kenkawh a nih theih nan duty tura ruat an ni.
Inkaihhruaina hman meka phal loh hrang hrangte chu khap chhunzawm a ni a, sorkar hnathawk Group A leh B chu a ngai angin pisa kai tur a ni a, Group C leh D-te chu a zatve an kal ang.
Kohhran leh mi mal enkawl company-ah hnathawktu zaa 50 an kal thei a, lirthei intlan chhawk dan chu a pangngai a kalpui tur a ni.
AMC pawn lam, Mizoram hmun dangah chuan DC-te an district chhunga hri darh dan dinhmun azirin inkaihhruaina na siam dawn a, mipui him zawk nan mipuite chu hri danna la vek tura beisei an ni.