Kan mualpho em?
Hun rei tak chhung chu Mizoram khawchhak lam atanga kuhva tawlhruk (tawlhlan a ni mah mah zawk ang chu) chuan kan ram mipui rilru a chawkbuaiin kan aupui ta luih luih a nih hi. Mipui authawm leh Champhai DC Maria CT Zuali hmalakna pawhin awmzia a nei hlei thei lova. Smuggler lam lah an huangtau em em a. An duh duhna laiah kalkawng an lai a ni tawh mai a. Kan ram venghimtu tura kan beisei kan police te lah Aizawl hqrs atanga hnungkhirh tlat niin an sawi bawk. Kuhva tawlh chu danin a phal ang hiala ngai pawh an tam hle. Kan sawrkar lam lahin an tel ve ni ngeia ngaih theihin he smuggling hi an thlir mai mai si a. Kum tawp dawn ruaiah Champhai DC thin in a tuar lova, kuhva man sa chu an hal ta hial anih kha.
Chutiang vela kuhva smuggling do a kan ram kan hlawhchham tawh hnuah Assam lam chuan kar kalta khan kuhva smuggling do beihpui an han thlak ve a. A mawhphurtu nia an hriat chu an mankhawm ta zawt zawt mai. Man hlaua tlanchhia pawh an kap zui bawk a. An tih tura harsatna siamtu chu an dim lo hle. Keini lamah chuan mihring man chu sawi loh, kuhva man sa haltu lakah FIR te an thehlut a. Smuggler ho lahin Champhai DC transfer turin CM ah an thlen ngam a. An transfer ta reng a. Smuggler ten TV ah interview te an nei thul. Hei mai hi a la ni lo, kan ruling party workers ten Champhai DC thiltih dan dik loh thu social media lamah an la vawrh darh char char zui bawk. Kan awmdan hi a mak a, hriatthiam a har tak zet.
Assamin kuhva smuggling an dona kawnga an hmalakna chu ram pumah puanchhuah chuai chuai a ni a. Kuhva smuggling chu Mizoram atanga lut a nih thu an puang nasa hle bawk.
Assam nen hian kan hmalak dan a va in ang lo em. Anni tan chuan smuggling hi dik lo leh sual a ni a. Keini ah chuan smuggling do chu sual dona ni lovin, sawrkar doah hial kan inpuh ta zawk daih mai. Kristian lo ram zawkin sual leh dik lo an tih, dan bawhchhiatna chu keinin kan pawmzam tlat maite hi in enchian kan va ngai em. Kan sakhuana ngaihtuah chiang chunga hma kan lak a ngai a. Kan sawrkar hian kan ram mualphona zahthlak zia hi hre chungin tih takzeta hma a lak a ngai. India rama smuggling hluarna state ah kan chhuak der tawh ania. Mi dik leh sual hua te au aw hi i ngaithla hram hram ang u.