Home Minister Lalchamliana hovin Central YMA leh police hotuten dan lova kuhva rah tawlh titawp tura hmalak ho dan tur an duang a, sorkarin check gate hawn belh dan tur leh tihchangtlun dan tur a ngaihtuah ang.
Central YMA hruaituten khawchhak lam atanga dan lova kuhva tawlh ruk ven nana check gate siam tura chief minister an ngenna bawhzui nan home minister chuan February 4,2022 khan Central YMA hruaitute hi a pisaah a kawm a. Dan lova kuhva tawlh ruk danchah a nih theih dan tur an sawiho a ni.
Kuhva tawlh ruk an duh loh chhan leh khawtlang leh mi mal nun a nghawng dante Central YMA hruaitute chuan home minister leh police hotute hmaah hian an sawi a, hemi kawnga hma la tura sorkar an beisei dante an sawi bawk.
Police hotu liante pawhin kuhva tawlh ruk titawp tura hma an lak dan leh an man tawh dan te an tar lang bawk ve bawk.
Thukhawmte chuan dan lova kuhva rah tawlh titawp tura hmalak ho dan tur duangin sorkarin check gate hawn belh dan tur leh tihchangtlun dan tur a lo en zui ang tihte, a theih ang angin check gate-a police duty-te dah belha tihchangtlun kawngah sorkarin hma a la ang tih leh dan lova kuhva tawlh ruk dona kawngah YMA-ten police-te tanpuiin a thawhpui ang tihte thutlukna an siam a ni.
Home Minister Lalchamliana chuan YMA leh police-te chu theihtawp chhuaha thawkho zel turin a chah a, Central YMA hruaitute pawhin sorkarin an thu thlente ngai pawimawha a tihhlawhtlin dan tur ruahmanna a siam chu lawmawm an tih thu an sawi ve bawk.