Nikum July 26-a state pahnih ramri inchuhna avanga inkahna a thlen hnuah Assam Chief Minister Himanta Biswa Sarma leh Mizoram Chief Minister Zoramthanga te chu a vawi khat nan an inhmu a. Zoramthanga zanriah buatsaihah hian Silchar police-in Myanmar atanga kuhva rah tawlh chungchanga an rinhlelh lian tak, Abu Mazumdar-a chu Zoramthanga tawiawmtu zingah a tel.
Inrinni zana zanriah an kilnaah hian Sarma hi a minister pakhat, Atul Bora-a’n tawiawmin Zoramthanga-a hi officer, politician lawk tak leh sorkar hnathawk bakah Mazumdar ten an tawiawm.
Cachar police chuan Inrinni zan vek khan Mazumdar-a hi Silchar-a Itkhola-ah a multistorey apartment an dap a. Cachar Superintendent of Police Ramandeep Kaur chuan Myanmar atanga Silchar kaltlanga kuhva rah tawlhnaa mawhphurtu ber nia an ngaih a nih thu an sawi.
Mazumdar-a hi kuhva rah sumdawnnaa inhmang thuk tak, Mizoram sorkar nena inhnimhnai tak niin police chuan an hria a. Zoramthanga hian engvanga zanriah kilnaa sawm ve nge a nih hriat a ni lo va, a thuihhruai zinga mi, Hazi Nizam Uddin-a chu police-in an kawl lai niin silaia kah hlim a nih avanga Silchar Medical College & Hospital-ah a awm mek.
Mazumdar-a hote zinga mi, Zakir Talukdar leh Ataf Hussain pawh police-in an enthlak lai an ni a. Police chuan anni pahnih an man thei hi hlawhtlinna ropui ta a nih thu an sawi nghe nghe a. Mazumdar-a pawh police-a a inpek phah theihna tur niin an ngai.
SP chuan kuhva tawlh chu state pakhat thil mai a ni loh thu a sawi a. Silchar chu an inhlan chhawnna ber a nih angin Cachar district chu a nghawng tuar thei an ni tih a sawi.