Congress hruaitu, Rahul Gandhi chuan Pathianni khan chief minister tang lai, Charanjit Singh Channi chu Punjab assembly inthlan lo awm turah an party chief minister candidate a nih dawn thu a puang.
Party chhunga boruak lian tak awm karah hei hi puan a ni a, “Thutlukna siam har tak a ni a; mahse, Punjab mipuiten mi rethei chhungkua atanga chief minister neih an duh avangin thutlukna siam awlsam tak a ni bawk,” tiin Gandhi chuan a sawi.
Chief minister atana an vawrh chhuah tur puan a nih hma hian dinhmun inchuh nia sawi pathum – Channi, Navjot Singh Sidhu leh Sunil Jakhar te chu a kawm hmasa hlawm.
“Keima thutlukna ni lovin Punjab-in a siam a ni a. Worker, candidate, MLA, mipui leh Punjab thalaite ka bia a, hetiang thutlukna siam tur hian anniho hian min kaihruai a ni,” tiin Gandhi chuan a sawi a. Congress chu lunghlu ang a nih avangin pakhat chauh thlan a harsat thu a sawi.
Congress-in Punjab inthlan tura chief minister atana an vawrh chhuah tur puan hian ngaihven a hlawh hle a. Gandhi-a hian Sidhu, Channi leh Jakhar te inkar hi ngun taka chhuiin Congress-in Punjab-a an hruaitute thawhho that theih dan tur a dap
“Thu sawi mai hi chu a awlsam em em a; mahse, kan hruaitute hi ngun takin ka rawn kual a, thil eng emaw a thlena an lo dawnsawn dante pawh ka en a. Politics hi eng emaw thiltihkhawm ang mai a ni lo va, zinkawng harsa hlir awm khawm a ni,” tiin Gandhi chuan a sawi.
“Mi tinin mahni puala beih kan nei theuh va, Prime Minister Narendra Modi pawhin amaha beih a nei a. Pu Sidhu, Pu Channi, Pu Jakhar te pawhin a hrang theuh beih an nei,” a ti.
Congress hi hruaitu lawkte zingah dinhmun inchuh awm anga sawi ni mah se Gandhi-a a thlen hnuah an inlungrual zui hle a. Jakhar-a hian Gandhi-a chuanna car khalhin Channi leh Sidhu chu a hnungah an thu dun a. Car video hi Punjab Youth Congress chuan Twitter-ah tar langin, “Hei hi Congress pumkhat dan leh Punjab-a hnehna a chan dan tur a ni,” an ti.
Party chief hluiin chief minister atana an candidate tur a puannaah hian candidate ni ve mai tura sawi rik leh chuhtu nia sawi pahnihte pawhin thu an sawi a, lungawi takin Channi-a chu an party chief minister candidate angin an pawm.
Congress hruaitu lawkte nen pawha inhmu thiam lo lek lek nia sawi, Jakhar-a chuan Gandhi chu fakin Amarinder Singh-a paih chhuaka chief minister atana Channi-a a thlan kha politics huanga Gandhi-a’n thutlukna a siamah chuan a la ropui ber a nih thu a sawi.
Jakhar-a hnuah hian Sidhu-a pawhin thu sawiin a bul tanna thin, ‘thoko taali’ tiin bul a tan a. Gandhi-a chu chief minister atana Channi-a siam thei awm chhun a nih thu a sawi.
Sidhu-a chuan party worker a nih reng thu a sawi a, minister chu a hlui a nih thei a, worker erawh a hlui a nih ve theih loh thu a sawi.
Thu a sawi lai hian Channi-a chu ko chhuakin a ban a pharpui a, a kuah bawk.
Channi-a hi March 1, 1963-a piang niin Punjab-ah chuan Congress hruaitu hlun tak a ni a. Amarinder Singh-a kaihhruai sorkar term hnihnaah khan Technical Education & Training Minister a lo ni tawh a, Punjab Legislative Assembly-ah pawh 2015 leh 2016 khan eptu leader a lo ni tawh.
September, 2021 khan Amarinder Singh thlakin chief minister a ni tan a, Dalit Sikh zinga an state chief minister hmasa ber a ni nghe nghe a. Politics lam hriate chuan Punjab-a hnam tam ber, Dalit mi a nihna chu an party-in an hnam zinga huang an zauh zelna turin chief minister atan hian an thlang niin an ngai hlawm.
Pathiannia Congress-in inthlan lo awm tura chief minister atana an vawrh chhuah leh tur a nih thu an puan hnuah hian Channi-a chuan Gandhi-a leh a elpui pahnih, Sidhu leh Jakhar chungah lawm thu a sawi a. Punjab tan zahawm taka hna a thawh tur thu Twitter-ah a tar lang.
“Congress High Command leh Punjab mipui, min ring a ni tih tilangtute chungah ka lawm em em a. Ni 111 liam ta chhunga Punjab-in hma lam a pan theih nana rim taka ka thawk in hmuh ang khan Punjab leh Punjabi-ten kawng dik an zawha hma an sawn theihna turin ka thawk dawn a ni,” a ti.
Chief minister atana candidate tur a nih thu puannaah Channi chuan thawhhona tha a pawimawh thu sawiin amah pawhin chu chu a tum a nih thu a sawi a, chief minister atan tu pawh candidate a thlawp tur thu a sawi.