Tripura-a BJP MLA hel pahnih, pakhat phei chu an hruaitu lawk, Sudip Roy Barman te chuan Congress an zawm a. BJP chuan an sorkar pheh thlum tuma phiarna niin an sawi.
Barman leh Ashis Kumar Saha te hian Delhi-a Rahul Gandhi-a chenna inah party General Secretary Priyanka Gandhi Vadra awm laiin Congress hi an zawm a. Tripura-a Congress in-charge Ajoy Kumar a awm bawk.
Barman leh a thianpa hian Congress an zawm hmain ngun takin Priyanka Gandhi an kawm bawk.
“MLA dangte pawh chhuah mai inpeih an awm a; mahse, eng emaw avangin an la nghak a. Mi tin mai party-ah an lawm lo va, Tripura hi Gujarat leh Himachal ruala inthlang thei dinhmunah an ding mek,” tiin Barman chuan Congress a zawm hnuah a sawi.
Barman leh Saha te hian Thawhtanni khan BJP an chhuahsan.
Congress an zawm ngei dawn nia ngaihna awm mah se Thawhtanni kha chuan an la zawm lo va. Inrinniah Tripura-ah hawin party chhuahsana lehlama an pen tak thu hi chiang zawkin an puang ang.
Tripura sorkar thupuangtu, Sushanta Chowdhury chuan, :BJP sorkar pheh thluk tumna a ni a; mahse, a tlu lo vang. Tripura-a BJP mite zawng zawngin sorkar hi an veng dawn a ni,” a ti.
Chowdhury-a hi tun hma lama Barman-a hnungzuitu rinawm tak thin a ni a, tunah erawh Chief Minister Biplab Deb-a hnungzuitu a ni tawh thung.
“Left-in thuneihna an chan leh theih nana puih an tum a; mahse, a zat zawnga chhutin keini hi kan la nghet em em a ni,” tiin Chowdhury chuan a sawi.
Congress chuan BJP MLA dang paruk vel nen pawh an indawr reng niin an sawi a. Nakuma assembly inthlan an neih hmaa zawm an tum niin an sawi.