Mizoram sorkara Power & Electricity deptt-in electric bill zaa 21.05 a tisang tura Joint Electricity Regulatory Commission (JERC)-a rawtna a thlen chungchangah nimin khan ZPM party-in complaint an thehlut.
ZPM party aiawha lehkha thehluttu, Secretary General PC. Vanlalruata chuan Mizoram sorkarin mipui harsatna siam zawnga electric bill tisang tura ruahmanna a siam chu hriatthiam har an tih thu a sawi a. Nikumah P&E department-in zaa 41.92-a sângin tariff tihpun a rawt tawh tih sawiin, hei pawh hi ZPM chuan na taka an sawisel thu leh tihniam tura theihtawp an lo chhuah tawh thu leh sorkar subsidy nen tangruala zaa 20.70 a tihthlak a lo nih tawh thu a sawi.
Kum khat pawh a ral hmaa a ngai ang bawka bill tisang tura sorkarin hma a la leh nghal chu ZPM party chuan an dem thu PC Vanlalruata chuan a sawi a. “Hripui avangin mipui an rum a, eizawnna nasa taka a khaihlak bakah sumah mipuiten harsatna nasa tak an tawh mek avangin sorkar chu mipuite harsatna sukiang zawk tur a nih laia harsatna siam zawnga hma a la hi hriatthiam har kan ti hle a ni,” a ti.
ZPM party chuan power siam chhuah kawngah sorkarin hmalakna a nei lo nia sawiin, power leina station paliah rate sang bika a lei chu tlawm zawka lei dan ngaihtuah se an ti a. “Power leina Rs. 7.36 per unit a nih laiin kan hralh ve hian Rs. 3.47 per unit a ni thung a, trading chungchang hi zirchian ni bawk se,” an ti. Electricity Act 2003-in a sawi anga generalisation, transmission leh distribution thliar fel hmasak pawh ZPM sorkar chuan rawtin, “Rs. 3,00,000 sem tura intiam sorkar hi tariff tihsan aiin subsidy siam turin kan phut,” an ti bawk.