MPCC Treasurer Zodintluanga Ralte chuan, “Mizoram Chief Minister Pu Zoramthanga chaw eipui, vai sumdawng hausa tak, thenkhatin smuggler an tih Abu Majumdar chungchangah sorkar insawi fiahnaah ‘CM Pu Zoramthanga sawm a ni lo’ tih an chhuah a, insawi fiah a ngai reng mai hi a buaithlak a ni,” a ti.
He thu hi nimina Congress Bhavan, Lunglei a tlawhnaah Zodintluanga Ralte hian a sawi a. Dan loa kuhva tawlh thua Assam sorkarin man tura a zawn mek, Majumdar chungchangah mipuin ngaihdan an neih vek tawh tih sawiin, “Eng ang pawhin insawifiah mah se, chaw an ei tlang tawh,” tia sawiin, he hnam dang sumdawng pa nen hian Mizoram chief minister hi inhnaivai tak an ni tih chu a rin theih mai niin a sawi.
Zodintluanga Ralte hian Congress sorkar lai khan hnam dang sumdawng hausa, Majumdar-a hian Mizorama buhfai supply a lo dil tawh a; mahse, Congress kaihhruai sorkar khan pek tlakah a ngai lo tih sawiin, “Abu Majumdar hi MNF sorkar veleha buhfai supplier lian tak niin an sawi bawk,” a ti.
Congress MLA Lalrindika Ralte pawhin thu sawiin, “Dik taka thil tih hi kan ram hian a mamawh a, sum lakluh dan pawh a thianghlim tur a ni. Pathianah innghat tlat ang u,” a ti bawk.