Colombia ram lailia tun hnaia ruah nasa taka sur avanga lei minah mi 14 vel an thi tawh niin thuneituten an sawi.
Thawhlehnia Risaralda province-a Dosquebradas khawpuia chenna in tam tak lei minin a chhilh leh hnawlah hian hliam tuar mi 35 chu damdawi inah enkawl mek an ni bawk.
Thuneitute chuan thlalak pho chhuakin tlang hnuaia awm hmun zau tak chu thil chhia leh lei min hnuhmain a khat deuh vek a ni.
Lui hnaia cheng mi eng emaw zat chu tuiin a lak mai hlauhthawnna avangin hmun dangah insuantir rih an ni bawk.
Chhanchhuah hna thawktute chuan chirh karah dam an awm la beiseiin zawn hna an thawk mek zel niin Colombia-a disaster management thuneitute chuan an sawi.
“Thawm ring tak kan hria a, kan tlan chhuah chuan in eng emaw zat chungah tlang chhip chu a lo innghat a ni,” tiin taxi driver Dubernei Hernandez chuan AFP news agency a hrilh.
“A hmun ka thlen chuan chhiatna lian tak a lo thleng a, mi eng emaw zat tang an lo la awm,” a ti.
Hernandez chuan ruang pahnih la chhuakin pakhat damin a la chhuak bawk tih a sawi a. In panga vel chirhin a chhilh hnan niin a sawi bawk.
Chhiatna thleng dinhmun thlirin thi pawh an pun ngei an ring hle.
Colombia-ah hian lei min hi thil thleng fo a ni a, ruahtui a tlak lai hian tlang awiha in sak leh chengte dinhmun chu a him lo thin hle.
Kum 2019 khan chhimthlang lam, Cauca province-ah lei nasa taka minah pawh mi 28 vel an lo thi tawh.
A hma kum hnihah pawh chhim lama Putumayo province-a lei minin Mocoa khua a chhilhnaah mi 250 chuang an lo thi tawh bawk.