auto corner
by Ruata
Dual airbag nen 2022
Mahindra Bolero chhuak ta!
India ram lirthei company lian leh hlun em em Mahindra chuan an SUV Bolero chu India sorkarin a phut angin airbag pahnih neiin an tichhuak thar.
Sorkar hmalakna
India ram sorkar hian India rama lirthei chhuak thar reng reng chuan airbag pahnih (dual airbag) a nei vek tur a ni a ti a. Hei hi himna lam ngaihpawimawh vang a ni a. Lirthei class hniam ber pawhin dual airbag a nei vek tawh tur a ni. Hei hi January, 2022 atanga hman tan tur a ni a, eng company pawhin an zawm vek tur a ni.
Lirthei man tlawm leh hetiang himna hmanrua vel pawha thawm ni ngai vak lo Maruti Suzuki Alto, S-Presso, Renault Kwid te bakah SUV lama a tlawm pawla ngaih Bolero te hian a hma chuan driver side airbag chauh an nei thin a. Hei pawh hi a man to hret hoah te a ni thin a ni. Passenger airbag a awm ve dawn a nih chuan pawisa pek belhin emaw a awm chauh thin kha a ni a. India sorkar chuan hei hi him loah ngaiin mipuite leh lirthei leitute an lo him zawk nan helamah hian hma a la a, eng lirthei man tlawm ber pawh ni se, dual airbag a neih vek a ngai tawh ang.
2022 Bolero-ah dual airbag
Company dang lirthei te an nei ta e tih thawm a awm tan hmain Mahindra chuan ngawi rengin an lirthei hlun leh lei hlawh em em Bolero-ah hian tunhnaiah dual airbag an lo vuah ta a. Dual airbag nei vekin an hralh zui tawh dawn a, Mahindra lam an che rang viau mai. Heti hian India sorkarin a phut chu an tifel a tih theih ta a. Bolero him lehzual mipuiten kan lei thei tawh dawn a ni. Mahindra Bolero hi tunah hian Rs. Nuai 8.85 – 9.86 man inkar (ex-showroom, Mumbai) a ni a. Mizorama a man nen chuan a inang lo hret ang.
Mahindra chuan hetia Bolero thara airbag an vuah belh takah chuan a chhung pawh tlemin an tidanglam a. A hmalamah hian a driver side-ah chauh ni lo, a passenger chuanna lamah pawh airbag hi an phum tel ta a. A hmaa mi kha chuan passenger tana vawnna tur niawm tak lawk deuh kha a dashboard-ah a nei thin a. Tunah chuan dashboard panel thar, faux wood garnish ngatin a passenger side lamah pawh a nei tawh dawn a ni. Hei hi a hmaa a dash lai taka music system leh AC vent bawr vela thing zia, dak nalh thlarh ang kha a ni dawn a ni.
Hei bakah hian Bolero hi dual tone colour (rawng chi hnih inpawlhin) an tichhuak tura beisei a ni a. Hei hi a thar a lo chhuah hma hian an enchhin lirtheiah hmuh a lo ni tawh bawk. Amaherawhchu hei hi a rawn thleng dik ta lemlo niin alang a, tunah hian monotone (rawng chi khat) thoin a lo chhuak leh a, rawng pawh chi thum – a var, a uk leh silver rawng te a rawn chhuak a ni.
A kentel tur leh a khawl
2022 Mahindra Bolero tharah hian dual airbag an rawn dah thar tih loh chu danglamna dang vak a awm lo a.
Heti a nih chuan a hmaa a kentel hrang hrang – Bluetooth-enabled music system with AUX and USB connectivity, manual air-conditioning, keyless entry, power steering, semi-digital instrument cluster leh himna lamah ABS with EBD, rear parking sensors leh speed alert te a rawn la neih chhunzawm dawn a ni.
A khawl lamah chuan a khawl ngai 1.5 litre, three cylinder mHawk75 diesel khawl, 75hp power leh 210Nm torque pechhuak thei a hman chhunzawm dawn a. A hnung kein a la phih kal chhunzawm zel ang a, transmission lamah pawh 5-speed manual gearbox a neih chhunzawm zel ang.
A man a sang hret dawn
Airbag an vuah thar hian a manah nghawng chhete a nei ve dawn a. Bolero hi trim level chi thum – B4, B6 and B6 Opt te a awm a. Heng ho man hi tuna Bolero man aiin Rs 14,000-16,000 velin a to ve dawn niin a lang. Mahindra Bolero tona hi a himna hmanraw neih thar nena ngaihtuah chuan a tam tham lo viau a. Bolero tha leh him bawk si, 2022 model itawm tak kan hmu thar leh ta a, a leitute tan pawh phur tharna tur tha tak te pawh a ni awm e.