Mizoramah Covid-19 leng a hluar zel a, February thla kal mek ni riat chhungin hri kai 14,893 hmuh a ni tawh.
February thla kal mekah ni 6 (Pathianni) tih loh ni dang zawngah hri kai 2,000 dawn thuak hmuh chhuah a ni a, hri kai hmuh chhuah tlem ber ni, February 6 kha Pathianni niin endikna hmun hawn mumal loh ni a ni.
Ni riat chhungin sample 53,939 endik a ni tawh a, chung atanga hri kai hmuh chhuah chu 14,893 a tling tawh a ni.
Hri leng hluar leh mek hian doctor rualte lu a tihai a, hetiang reng a nih chuan Mizoram hi dinhmun tha lo takah a din hlauhthawnna an nei lian hle.
The Zozam Times-in doctor thenkhat a kawm kualte chuan mipuite an inthlahdah deuh nia an ngaih thu an sawi hlawm a, inkharkhipte a rem tawh rih chiah loh avangin hri laka inven chu mi tin mawhphurhna a nih thu an sawi.
Hemi chungchangah Covid-19 chungchanga sorkar thupuangtu, Dr Pachuau Lalmalsawma pawh The Zozam Times-in a bepawp a, ani pawhin mipuite fimkhurna kawngah tan an lak zual a tul thu a sawi ve bawk.
Dr Pachuau Lalmalsawma chuan, “Mipuiah Covid-19 ngaihzamna a awm deuh niin a lang a, symtomp nei, in-test duh lehte pawh an awm a, hei hi hri tidarh zeltu a nih thei tih leh hri leng laka Mizoram dinhmun that leh that loh chu mipuiah a innghat thui hle,” a ti.
Covid-19 vanga nunna chân zingah nausente pawh an awm tel tawh thu sawiin, hri avanga naupang boral an awm zel loh nan nu leh pate chu an fimkhur zual a tul thute, tuna hri leng dinhmun thlirin inlenpawh hun a ni lo a, inkharkhip kalpui ni lo mah se mi tin an inkharkhip thiam a tul hle tih a sawi.
Nimin tlai thleng khan Mizoramah Covid-19 kai mi 1,89,915 an awm tawh a, enkawlna hmun atangin mi 1,78,071 an chhuak tawh a, mi 628-in an thih phah tawh a, hri kai enkawl lai mi 11,216 an awm.