Tlang lawn mi pakhat, hliam a tuar avanga a tlang lawn lai ding ngil tha taka khuar awma darkar 48 dawn tui leh ei tur tel lova awm chu Indian Army-in him takin an chhanchhuak.
India chhim lam, Kerala-a an chhan chhuah hi kum 23 mi, R Babu niin Thawhtanni khan a thian pahnih nen tlanga kea an kal (hiking) chu tawlh palhin tlang awih ding tha takah hian a tawlh liam a ni.
Army-in an chhanchhuah hma hian rescue team pathum thawk chhuak tawhin an hlawhchham zel a ni.
Nilaini zingah khan Indian Army chuan an bepawh ta a ni.
“Sipaiten chhan chhuah hna hi thawkin R Babu-a hi an bepawp thei a, tui leh ei tur pawh an pe thei a. Invenhimna hmanrua an pek hnuah tlang chhipah an la chhuak thei ta bawk a ni,” tiin news website Manorama chuan a tar lang.
Feet 1,000-a sang, Palakkad district-a Kurumbachi tlang hi a awih chhengchhiat em avanga hriat hlawh niin a hmain forest department pawhin trekker-te tan tlang chhipa hiking-a kal a hlauhawm thu an lo sawi tawh thin.
Babu-a tlang awih pang khuara a tlak luhna hi a chep hle a, amah a leng tawk chiah chiah chauh nia sawi a ni.
A thianten thing leh hrui hmanga pawh chhuah an tumna a hlawhchham hnuah chhukin police puihna an dil ta a ni.
Babu-a hian a phone-a thla lain a awmna lai chu a hrilh theih hlauh bawk.
Chhanchhuah hna thawh nan hian drone pawh hmangin a awmna lai velah thlawkin an zawng hmasa bawk.
Thawhlehni khan Coast Guard helicopter chuan vawi eng emaw zat chhanchhuah tumin a bei a; mahse, a tlang awm dan a chhengchhiat avang leh a tanna chu thlawhna tan a hniam em avangin an chhan chhuak thei lo.
Hemi tuma chhan chhuah tumtute hian tui leh ei tur pawh an pe thei lo bawk.
Bialtu MLA Shafi Parambil chuan Babu-a hi a chau chak hle tih a sawi a. “Thawhlehni chhun thleng kha chuan chhanchhuah tumtute chu a lo vai thei a; mahse, tlai lamah chuan a chak lo tawh hle a ni,” a ti.
Thawhlehni zan khan thuneitute chuan ramsa laka a him nan flambeau an chhitsak niin chhanchhuah hna thawhnaa tel ve thuneitu pakhat chuan Hindustan Times chanchinbu hnenah a sawi.
State chief minister-in Indian Army puihna a ngen hnuah an thawk chhuak ta a. An beih ve fe hnuah an bepawp thei ta a, an la chhuak zui ta a ni.
Babu-a hi damdawi inah dah nghal a ni.