Mizoram chief minister-in Mizo zirlai tam takin Sainik School an chhawr tangkai thu leh lian zawka he zirna in hi a than chhoh zel a duhsak thu a sawi.
Union Defence Minister Rajnath Singh hoa nimina biak hmuh hmuh theih hmanga Sainik Board of Governors’ virtual meeting neihah Chief Minister Zoramthanga chuan Mizoramin National Defence Academy leh Naval Academy-a luh tum leh duhte buatsaihna tha tak a nei chu lawmawm a tih thu te, discipline inzirtir kawngah leh co-curricular activities tha tak tak kalpui a ni thin chu lawmawm a tih thu a sawi.
Board of Governors’ meeting-ah hian thu ngaihtuah tur hrang hrang chhawpchhuahte sawiho a ni a. Chung zingah chuan Sainik School din belh leh school dinna tur ram neih belh chungchang te, Board of Governors member tihpun leh a dangte a tel a. An thurel hrang hrang chu state tinten an ngaihdan leh sawi belh duh an neih chuan ni 10 ral hmain ziaka sorkar laipuia thlen turin member-te an inhrilh a ni.
He thutkhawmah hian chief minister leh Education Minister Lalchhandama Ralte te chuan CM office atangin an chhim.
April 21, 2017 khan Mizorama Sainik School, Chhingchhip hi din a ni a. National Defence Academy leh Naval Academy-ah an luh theihna tura mipa naupangte buatsaih chu a tum ber a ni a. Kum 2018-19 academic year atan hmeichhe zirlai admit tan niin, ram chhung Sainik School zinga hmeichhia te tan admission pe hmasa ber a ni.
Sainik School inrelbawlna hi autonomous body niin, defence minister kaihhruai Board of Governors chu a enkawltu rorel sang ber a ni a. Chief minister leh education Minister te member zingah an tel a. Local Board of Administration awm lehin, anni hian school hmalak zel dan turah ruahmanna siam turin hunbi neiin an inhmukhawm thin a ni.