EDITORIAL 11/2/22


Grape chingtute manganna hi ngaihtuah a ngai

Grape chingtuten hlawhtlinna an hmu chho tan dawn chauh a, hmalakna lian tham tak tak an neih chhoh ve mek laiin sorkar lam chuan tihtawp tumin hma a la ta rup mai si a, ennawnsak a ngai hle mai. Hnahlan leh Champhaiah grape atanga wine siamna sorkar hriatpui thlapa din a ni a, state dang atang pawhin fakna awka an dawn mek laiin tihtawpsak an ni tur hi a lungchhiatthlak a, eizawnna dang tha zawk sorkar in a pe lo a nih ngat phei chuan chawbel eibenbuaksakna duhawm lo tak a ni ngei ang.
ZPM Leader Lalduhoma’n statement siam a a sawi dan phei chuan, Grape hi kum 2005 atang khan eizawnna thama chin tan a ni a, tunah hian Hnahlan leh Champhai velah chhungkaw 750 velin an ching mek a. MLTP Act 1995, Section 70-na hnuaiah Mizoram Excise & Narcotics (Wine) Rules, 2008 siamin sorkar hriatpuia chin a ni, a ti a. Cabinet Sub Committee-in wine zawrh leh siam khap tura thutlukna a siam chu cabinet-in ennawn leh se an an duh thu a sawi bawk.
Zu zawrh duh lo sorkar kan hrawn mek a, wine shop awm zawng zawng pawh tihtawp a ni bawk. A lawmawmin, chhungkaw tam tak tan chuan thawven huaina tham a ni ngei mai. Mahse, kan ram chhung ngei atanga tharchhuah leh mi tam takin eizawnna atana an hman, sorkar hriatpui thlap ni bawk grape zawrh leh siam khap thleng thlenga hma an la hi chu a fuh chiah lo deuhin a lang.
Kohhran tin deuh thawin sacrament te kan nei a, heng atana mahni tharchhuah ngei hman hun nghakhlel tak tak an awm kar a, a thim lam zawnga thlir tlat mi tlemte an awm avanga kan ram tharchhuah hnawl tumna hi a a fuh lo hle. Sorkar pawh hian ngaihtuahna seng zui ngei teh se.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427