Oscar 2022 dawng thei tur chhawp-chhuah zinga bess actress huangah mihang an lang lo chhunzawm leh ta. Halle Berry chuan Best Actress (Oscar) a dawn hnu a hmeichhiate’n Best Actress an dawng zui ta miah lo chu a rilru nat thlak, a ti.
Kum 2002 khan ‘Monster’s Ball’ film-a a chetthat vangin he award hi a dawng a, kum 20 zet a liam tawh chung pawh hian mihang hmeichhiate kuta hlan a ni lo vang vang mai chu a hrethiam thei lo a ni ber.
“Khami zan khan ‘Tun atang chuan mihang hmeichhiate pawhin ka dinna angah hian an ding chho ve dawn a ni’ tih ngaihdan nghet tak ka nei kha a ni a. Mahse, tunah chuan kum 20 a liam tawh a, tuma’n an dawng chhunzawm tawh lova, a hnai vai hriat tur a awm bawk hek lo. Ka thlirlet a, ka ngaihtuah kir a, ‘Kuminah te chuan emaw kumin ngei ngei’ tiin beiseina nen ka thlir leh thin a, mah se, an dawn chhunzawm tâk loh avangin ka rilru a na a, he thinlung hi a keh a ni,” tiin Halle hian a sawi.
Kum 2002 atang khan mihang hmei-chhia 12 te chu Best Actress award dawng thei tura chhawp chhuah an ni tawh a. Mah se, a tak ram thleng thei erawh pakhatmah an la awm lo thung.