Hri leng karah sorkar in ruahmanna a siam thiam a tul
Hri lengin reh lam a la pan thei lo a, a thawh thumna kan tuar leh mek nite pawhin sawi a ni thin bawk. Kan fimkhur sauh sauh a ngai a, mahni theuh hi fimkhur ngai kan ni tih pawh kan inhriatthar a tul hle mai.
Sorkar pawhin ruahmanna a siam thiam a, rawtna leh thurawn hrang hrang a pawm thiam lo a nih chuan mi tam tak leh pawl tam tak ngaihdan pela kalin, an invaupung tawn khum ang tih a hlauhawm hle.
Tunah pawh sumdawng pawl inzawmkhawmna Mizoram Merchant Association (MIMA) chuan dawr inhawnchhawk zawnga sorkar a kal chu tha lo an tih thu an aupui leh a, dawr inhawnchhawkin hri leng a tidarh tak tak lova an hriat thu an sawi bawk a ni.
Ni tina inhawng damdawi dawr leh eichawp dawr atanga hri kai sawi tur tih tham an awm lo tih MIMA chuan sawiin, hei hian dawr chu hri darhna a ni lo tih a tichiang niin an sawi a. “Hri remna tur chu nise dawrkaite hian dawr kan hawng lo rei lutuk tawh, kan dawr khar avangin hri punna a hniam phah lo hlein kan hria a, inhrekna chi khat mai niin kan ngai a, hetiang rorelna khairual lo hi sumdawngte min timangangtu leh beidawnnaa min hnuk lut mektu a ni,” an ti bawk.
Sorkar hian ngun takin ngaihtuahna hmang se la, mipuite leh sumdawng, loan la a theihtawpa intungnung ve hram hramte dinhmun ngaihtuah chunga ruahmanna pawh hi a siam thiam a hun tawh hle. Chuti ni lova kal dan ngaia kan kal reng a nih chuan hmasawn lo zia, mipui rintawk lohna chiah an hlawh chho zel ang tih hlauhawm tak a ni. Ramdang leh hmun danga an kal dante pawh thlir thiam a tha tawh khawp mai.