Tamil Nadu-a pa pakhat ruang chu a bo atanga ni riatna ah hmuh a ni a, Kodaikanal-a Red Rock kham kotlanga selfie a lak laia chesual a ni.
Kum 32 mi Ram Kumar hi a thiante nen February 2 khan Kodaikanal an tlawh a, chetsual palh hlauhawm vanga thuneitute’n tlawh an khap Red Rock kham kotlangah an kalkhawm a. Kham kotlanga an awm lai hian Ramkumar hi Selfie lak tuma a insiam rem laiin, a tawlh thla ta niin, a thian-te’n an sawi.
Forest thuneitute, police leh tlang lawn thiam te chuan a tlakna hmun nia sawiah hian ni ruk chhungzet zawn hna an thawk a, kham pang hi a awihin, chetvel a rem loh em vangin Ramkumar ruang hi an hmu thei lawk lo nghe nghe.
Chhanchhuahna thawktu team-ah hian mi 30 velzet awmin, drone te nen an thawkrip hle a, a bo atanga ni riatnaah a ruang an hmu ta chauh a ni.
Spanish iO Foundation zirchianna ah January 2008 leh July 2021 inkar khan Selfie lak laia chetsualna vanga thi mi 379 an awm. Chumi awmzia chu ni 13 dan zelah selfie lak kawihhnawiha thi pakhat an awm ziah, tihna a ni.