ZPM party thalaiin SEDP board sum hman ral leh an hnathawh a inmil lo niin an sawi a. MNF party flagship programme SEDP board chu sorkarna an chan aṭanga kum 4-na an hman mêk laiin vawi 1 chauh an la thukhawm tih sawiin, hei hian MNF sorkarin SEDP a ngaihpawimawh tawk loh zia a tichiang niin an sawi.
ZPM thalai chuan “SEDP board phuahchawpah hian vice chairman-te chu minister of state rank pek niin, MLA ni lo vice chairman-te pawh a hranpaa hlawh pêk an ni a, vice chairman-te hi staff leh lirthei pek an ni” an ti a. SEDP board hrang hrangin kumkhata an sum hman Rs. vaibelchhe 2.6 a nih laiin hna erawh an thawk mang lo nia sawiin, mak an tih thu an sawi.
“Kum 4 chhung hian SEDP board phuahchawpte hian engnge an lo thawh, tih hi kan zawhna a ni” ZPM thalai chuan an ti a. “An sum hman ral leh an hnathawh hi a inmillo hlein kan hria a, SEDP board-te hi hrilen lai, sum harsat laia awmze nei lova sum tam tak eiraltu an nih bakah, mipui sum bawm rawktu ni ah kan ngai” an ti bawk.